Adam aǵzalaryn zańsyz aldy dep aıyp taǵylyp, 3 aıǵa jýyq ýaqyt qamaýǵa alynǵan transplantolog dáriger Ǵanı Quttymuratovtyń isine qatysty taǵy bir derek anyqtaldy, dep habarlaıdy Qamshy.kz aqparat agenttigi Zakon.kz saıtyna silteme jasap

Bul iste qazaqstandyq dárigermen qosa qyrǵyz azamaty da kúdikke ilingen. Al qazaqstandyq dárigerdiń áriptesteri elimizdiń Bas prokýrory men İshki ister mınıstrinen Ǵanı Quttymuratovty tergeý amaldary aıaqtalǵansha, ýaqytsha bosatýdy surap, hat jazypty. Olar onyń kinási joqtyǵyn aıtyp, dálelder keltiredi.

Kúdikti tar qapasta otyryp, áriptesterine hat joldaǵan eken. Onda ol "meni Izraıldik kompanıamen kelise otyryp, shetel azamattaryna zańsyz ota jasady dep aıyptaýda" dep jazǵan kórinedi. Al, elimizdegi belgili aqhalattylar keshe baspasóz máslıhatyn ótkizip, "Quttymuratov tek basshylardyń aıtqanyn oryndaýshy, ol sheteldik kompanıalarmen jeke dara kelisimge kelmegen" dep málimdedi.

"2017 jyly Izraıl kompanıasy Quttymuratov bólim meńgerýshisi bolyp jumys istegen ulttyq onkologıalyq jáne transplantologıalyq ortalyqtyń basshylyǵymen Qazaqstanda medısınalyq týrızmdi uıymdastyrý úshin tiri donordan búırek transplantasıasyn júrgizý jáne osy ortalyqtyń bazasynda aýystyrýǵa sheteldik pasıentterdi tartý boıynsha transplanttaý kelisimshartyn jasaıdy. Shartta barlyq uıymdastyrýshylyq, zańdyq, qarjylyq aspektiler kórsetilgen. Kelisim jasalǵan sátten bastap ortalyqqa sheteldik donorlar da, resıpıentter de túse bastaıdy",- dedi "Medısına qyzmetkerleriniń quqyqtaryn qorǵaý" qoǵamdyq birlestiginiń prezıdenti Nurlybek Óserbaev.

Tipti ataqty transpantolog Iýrıı Pá da "taǵylǵan kiná aqylǵa qonymsyz", - deıdi.

"Endi Quttymuratov búırekti aýystyryp salý boıynsha jeke-dara aýrýhanaǵa jatqyzýdy, uıymdastyrýdy jáne operatıvtik aralasýdy júrgizdi dep aıyptalýda. Árıne, ol bólim meńgerýshisi retinde aýrýhanaǵa jatqyzýǵa qatysqan, biraq ol ony uıymdastyrýy, ıaǵnı, pasıenttermen kelisip, olardy taýyp, olardyń arasynda qandaı da bir kelisim jasaýy múmkin emes",- deıdi "Ulttyq ǵylymı kardıohırýrgıa ortalyǵy" AQ Basqarmasynyń tóraǵasy Iýrıı Pá.

Aıyptalýshynyń qorǵaýshysy Quttymuratov 1-shi mamyrdan bastap qamaýda ekenin aıtady. Ol sottyń sanksıasymen 4 aıǵa temir torǵa toǵytylǵan. Sondaı-aq, dárigermen birge shetel azamaty da kúdikke ilinip, qolyna kisen salynǵan.

"Qazirgi kezde eki adam qamaýda otyr. Bireýi Quttymuratov - dáriger, ekinshisi - Qyrǵyz Respýblıkasynyń azamaty. Áıel adam aýdarmamen shuǵyldanǵan. Basqa adam ustalǵan joq. Endi sheteldikter orys tilin de, qazaq tilin de bilmeıdi ǵoı. Basqa eldiń azamaty bolǵannan keıin sol kisilerdiń arasynda aýdarmashy bolyp qyzmet jasaǵan",- deıdi advokat Aldırza Qýanyshkereev.

Qylmystyq kodekstiń qos baby boıynsha kúdikke ilingen dáriger isin İshki İster mınıstrliginiń tergeý komıteti júrgizýde. Tipti memleketaralyq tergeý toby da qurylǵan.

"Adamdardyń organdaryn bolmasa terilerin zańsyz saýdalaý, bolmasa soǵan májbirleý jáne de transulttyq topqa qatysý arqyly qylmys jasaý baby boıynsha tergeý júrip jatyr.Tergeý amaldaryn iske asyrý úshin ózara, ıaǵnı memleketaralyq, vedimistik tergeý toby qurylyp otyr",- deıdi QR İİM resmı ókili Nurdilda Oraz.

Qazaqstanda transplantasıa jasaý ózge eldermen salystyrǵanda arzanyraq. Mysaly, Eýropa elderinde búırek transplantasıasy 80 myń dollardan 150 myń dollarǵa deıin jetedi. Al sheteldik azamatqa mundaı operasıany Qazaqstanda jasatý úshin 7-8 myń dollar kóleminde qarjy qajet eken.