22 maýsymda Jambyl oblysy Shý aýdanynda «Oblys aýmaǵynda veterınarıalyq – sanıtarlyq qaýipsizdikti qamtamasyz etý máseleleri» atty oblystyq semınar-keńes bolyp ótti.

Atalǵan jıynǵa oblys ákiminiń orynbasary Murathan Shúkeev, oblys ákimdigi veterınarıa basqarmasynyń basshysy Ospan Berdıarov jáne Jambyl oblysyndaǵy barlyq aýdannyń veterınarıa salasyna jaýapty mamandary qatysty. Semınar-keńestiń baǵdarlamasyna sáıkes, Shýǵa arnaıy atbasyn burǵan qonaqtar aldymen aýdandyq veterınarıalyq kásiporyn mekemesiniń aýmaǵynda ornalasqan veterınarıalyq bıopreparattardy uzaq merzimde saqtaıtyn qoımanyń jáne ıesiz, qaraýsyz qalǵan janýarlardy ıesi anyqtalǵansha ýaqytsha ustaý ornynyń jumysymen tanysty. Sonymen qatar, janýarlardyń ólekselerimen bıologıalyq qaldyqtardy jáne vaksınalardan bosaǵan quty ydystardy órteýge arnalǵan ınsınerator qondyrǵylarymen, brýselezge shaldyqqan ýaq maldardy sanıtarlyq soıý alańyna tasymaldaý aldynda jınaqtaıtyn ızolátormen sondaı-aq, Tóle bı aýyldyq okrýginiń veterınarıalyq pýnktiniń de jumysyn kózben kórip, ózara tájirıbe almasty.

Budan ári semınar-keńes aýdan ortalyǵynda ornalasqan veterınarıalyq pýnktiń májilis zalynda jalǵasyn tapty. Basqosýdy oblys ákiminiń orynbasary Murathan Júnisáliuly ashyp, jalpy óńirimizge qarasty aýdandardaǵy veterınarıalyq qyzmettiń deńgeıin sóz etti. Ol óz sózinde semınar-keńestiń dál osy Shý aýdanynda uıymdastyrylýynyń da ózindik sebebi bar ekenin aıtty. Óıtkeni, mundaǵy veterınarıalyq qyzmet bir jolǵa qoıylyp, ózge aýdandarǵa úlgi bolarlyqtaı júıeli jumys jasaýda. Sonymen birge, oblys ákiminiń orynbasary Jambyl oblysy úshin et eksportyn qolǵa alyp, úlken naryqqa shyǵýǵa mol múmkindik týyp otyrǵanyn jetkizdi. «Qazirgi kezde shet memleketterge et eksporttaýǵa úlken múmkindik týyp otyr. Onyń ústine, bizdiń aldymyzda aýylsharýshylyǵy ónimderin eki esege deıin arttyrý mindeti tur. Ol úshin eń aldymen oblystyń epızotıalyq jaǵdaıy qalypty deńgeıde bolýy tıis. Búgingi tańda óńirimiz bul baǵytta respýblıka boıynsha aldyńǵy qatarda. Bunyń bári, árıne, sizderdiń ıaǵnı, veterınarıa salasynda eńbek etetin mamandardyń arqasy. Osy epızotıalyq turaqtylyqty aldaǵy ýaqytta da dál osy qalpynda saqtap qalýymyz kerek» - dedi M.Shúkeev.

Semınar-keńes barysynda oblys ákimdigi veterınarıa basqarmasynyń basshysy Ospan Berdıarov óńirdegi epızotıalyq jaǵdaı boıynsha baıandama jasap, birqatar aýdandarda oryn alǵan kemshilikterdi tilge tıek etse, jumysy bir jolǵa qoıylǵan aýdandarǵa odan ári de osy baǵytta birlese jumys isteýge shaqyrdy. Óz kezeginde aýdan ákiminiń orynbasary Álıhan Balqybekov aýdannyń veterınarıa salasynda atqarylyp jatqan aýqymdy isterge keńinen toqtalyp, aldaǵy josparlarmen de bólisti. Jıyn sońynda ózge aýdandardan kelgen sala mamandary óz pikirlerin bildirip, keıbir túıtkildi máseleler boıynsha qoıylǵan suraqtaryna jaýap alyp, ózara tájirıbe almasty.

Shapaǵat Qonysbaı