QR Premer-Mınıstri Asqar Mamın Qazaqstandaǵy AQSH elshisi Ýılám Mozermen kezdesti dep habarlaıdy Qamshy.kz aqparat agenttigi QR Premer-Mınıstriniń resmı saıtyna silteme jasap.

Kezdesý barysynda ınvestısıalyq salada, munaı salasynda, agroónerkásiptik sektorda yntymaqtastyqty odan ári damytý máseleleri talqylandy.

"Qurama Shtattar Qazaqstannyń basty seriktesteri men ınvestorlarynyń biri bolyp qala bermek", — degen QR Premer-Mınıstri, 2018 jylǵy qańtardaǵy QR Tuńǵysh Prezıdenti N. Á. Nazarbaev pen AQSH Prezıdenti D. Tramp qol jetkizgen ýaǵdalastyqtardy iske asyrýdyń, sondaı-aq, ózara tıimdi ózara is-qımyl kókjıegin keńeıtýdiń mańyzdylyǵyn atap ótti.

2018 jyldyń qorytyndysy boıynsha QR men AQSH arasyndaǵy taýar aınalymy 37,3%-ǵa $2,2 mlrd deıin ósti. Amerıkalyq ınvestısıalardyń Qazaqstan ekonomıkasyna aǵymy 44,7%-ǵa ósti jáne $5,3 mlrd jetip, jańa absolútti rekord ornatty.

"Investısıalar tartyp, strategıalyq ınvestısıalyq jobalardy iske asyrý úshin ınvestorlarǵa asa qolaıly jaǵdaı jasaýǵa erekshe nazar aýdarylady. Jańa tásilder amerıkalyq seriktester úshin neǵurlym qolaıly jaǵdaı jasaıdy", — dedi A. Mamın.

Perspektıvaly eksportqa baǵdarlanǵan salalarda ınvestısıalyq jobalardy iske asyrý máselelerin tıimdi sheshý úshin tikeleı sheteldik ınvestısıalar boıynsha Úılestirý keńesi jáne Tikeleı sheteldik ınvestısıalar qory quryldy.

QR Premer-Mınıstri iri amerıkalyq kompanıalardyń agroónerkásiptik sektordaǵy jobalaryn júzege asyrýdyń perspektıvalyǵyn atap ótti jáne óńir naryqtaryna shyǵýmen Qazaqstan aýmaǵynda óndiristi uıymdastyrýdyń múmkindigine toqtaldy.

Óz kezeginde, Ý. Mozer ınvestısıalyq ahýaldy jaqsartý tásilderin joǵary baǵalap, amerıkalyq taraptyń yntymaqtastyqty qoldanystaǵy formatta jalǵastyrýǵa daıyn ekenin jetkizdi.