Búgin Qostanaı qalasyndaǵy №2 soty 97/98 «Nur-Sultan – Aqtóbe» baǵytyndaǵy poıyzdyń eki jolserigine qatysty úkim kesti dep jazady

Jolserikterge 2018 jyldyń 26-qyrkúıeginde «Tulpar-Talgo» poıyzynda kýpedegi qyzǵa seksýaldy zorlyq-zombylyq kórsetti degen aıyp taǵylǵan.

Qoǵamdy dúr silkindirgen shýly oqıǵanyń jarıa bolyp ketýine «ne molchı.kz» qozǵalysynyń kóshbasshysy Dına Smaılova sebep boldy.

Onyń aıtýynsha, jábirlenýshi áıel Nur-Sultan qalasynan Aqtóbege qaıtyp kele jatqan. Alǵashynda kýpede jalǵyz bolypty. Artynsha meıramhanaǵa tamaq ishýge ketedi. Qaıtyp kelse, azamattyq kıimdegi jolserik otyrǵan. Biraq áıel jolserikti shyǵaryp jiberedi.

«Áıel qorqynyshtan eshqandaı áreket jasaı almaı qalǵan. Ol dem ala almaı, qozǵala almaı jatyp qalypty. Jolserik aram oıyn júzege asyra salysymen kýpeden shyǵyp ketedi. Jábirlenýshi qozǵala almaı biraz jatyp qalady. Sol ýaqytta ekinshi jolserik kelip, ol da aram nıetin júzege asyrǵan. Ekinshi jolserik shyqqan kezde ǵana áıel turyp esikti japqan. Biraq álgi jolserik umyt qaldyrǵan telefonyn alýǵa kelgen. Oǵan qarsylyq kórsetken áıel birneshe soqqy alǵan», - dedi Smaılova óz paraqshasynda.

Áıel sol mezette polısıa shaqyrady. Bul jaǵdaı Qostanaı oblysynyń terıtorıasynda bolǵandyqtan, atalmysh ispen jergilikti polısıa aınalysty. Sot otyrysy Qostanaı qalasynda jabyq rejımde ótken.

Búgin sot úkim kesti. Ek jolserik te kináli dep tanylyp, 2 jyl 6 aıǵa bas bostandyǵynan aıyryldy.