RF Joǵarǵy dýmasynyń depýtaty, RLDP-nyń jetekshisi, reseılik saıasatker, ınternettiń juldyzy, dýmadaǵy daýqumar depýtat – Vladımır Jırınovskııdiń jańa vıdeosy qazaqstandyq BAQ-ta qyzý talqyǵa tústi.  Onda Jırınovskıı myrza «Razgovor po dýsham» vıdeoblogynyń avtorymen kezdesip, Qazaqstan týraly shynaıy kózqarasyn jetkizgen-mys. Bul týraly «Qamshy» portaly www.nur.kz-ke silteme jasaı otyryp habarlaıdy.

Óz  baıandamalarynda árnege bir shúıligip, aqylǵa qonymsyz derektermen eldi dúrliktirip júretin reseılik saıasatker sabasyna túsipti, táýbesine kelipti.

Ol Qazaqstan jaıly aıtqan sózderin jýrnalıser burmalady dep aqtalǵan. “Almaty – meniń týǵan qalam. Men Qazaqstanda 18 jyl turdym… Reseıde eshkim Qazaqstannyń mártebesi men shekarasyna kúmán keltirmeıdi. Bizdiń sózderimizdi keı jýrnalıser burmalap jetkizip jatady. Máselen “Eho Moskvy” radıosynda Plúshevke suhbat bergen bolatynmyn. Onda biz Ýkraına, Donbassty talqylap otyrdyq. Ol “kelesi kezekte kim, Qazaqstan ba?” degen suraq qoıdy. Men “keıin” dep bul máseleni talqylap jatpaǵanymyzdy ańdatý úshin aıtqan edim. Alaıda jýrnalıser qıyp alyp kórsetipti. Sodan qazaqstandyqtar muny ózderinshe túsinip, kelesi kezekte Qazaqstan tur dep uǵyp qaldy”, – dep túsindirgen.

Iá, óziniń ýly tilimen anany bir, mynany bir shaǵyp júretin reseılik saıasatker(Jıren sary) Qazaqstannyń terıtorıasyna eshkimniń kóz alartyp otyrmaǵanyn, shekarany eshkimniń ózgertýge árekettenbegenin aıta kele, ortadaǵy arandatýshylar Qazaqstan men Reseıdiń asyndaǵy qarym-qatynastarǵa syzat túsirýdi kózdegender ekenin jetkizgen.

Sonymen qatar, Qyrǵyzstanmen bolǵan túsinispeýshilikterdi de tizbektedi. Buǵan deıin Qyrǵyzstanǵa ekonomıkalyq daǵdarystan shyǵý úshin Ystyqkóldi satyp jiberý týraly usynysy jaı ǵana keńes bolǵanyn jáne kezinde Reseı de Aláskany satyp, tyǵyryqtan shyqqanyn alǵa tartty.

Óz keńsesinde jýrnalıske jap-jaqsy suhbat berip otyrǵan Jırınovskıı myrza,  Qazaqstanǵa, Qyrǵyzstanǵa qarata aıtqan málimdemelerdiń jalǵan ekenin, ony burmalap jibergenin, óziniń orta Azıa elderine jaqsy kózqarasta ekenin aıtyp aqtala kele, sóz sońynda baıaǵy ádetine basqan.

Ol Almaty qalasynda ornalasqan mektepterdiń birine jáne Masanchı kóshesine óziniń esimin berýge qarsy emes ekendigin jetkizgen.

“Qazaqstan – meniń týǵan jerim. Men tipti Almatydaǵy Masanchı kóshesiniń ataýyn Jırınovskıı dep ózgertse de qarsy emespin. Al ózim oqyǵan №25 mektepti Jırınovskıı atyndaǵy dep te ataı bersin. Múmkin bolashaqta solaı istegisi keletinder tabylar, bálkim? Esesine týrıser kóp keletin bolady. Bul ózderińe tıimdi. Sondyqtan aldyn-ala kelisimimdi beremin”, – dep sózin aıaqtaǵan.

Nurzat Toǵjan