Dáriger-oftalmolog Suńǵat Kópenovtyń aıtýynsha, sońǵy 30 jylda alystan nashar kóretinder (mıopıa) 4,5 esege kóbeıgen. Bul týraly Sputnik Qazaqstan jazady.

«Kóz aýrýlary jastar arasynda jıi kezdese bastady. Onyń órshýine gadjetterdiń áseri orasan. Sonyń saldarynan «qurǵaq kóz» sındromynyń artqany baıqalady. Bul buryn eresek adamdar arasynda jıi ushyrasatyn» – deıdi ol.

Dárigerdiń sózinshe, planshetter men smartfondar kompúterge qaraǵanda kózge anaǵurlym kóp zıanyn tıgizedi.

«Kompúter monıtoryndaǵy áripter iri bolǵandyqtan kózge jaqsy kórinedi. Sáıkesinshe, ondaǵy mátindi kórý úshin kózge kóp kúsh salynbaıdy. Al smartfon men planshettegi mátindi oqýda kóz janaryna úlken kólemde únemi júk túsedi. Saldarynan kórý qabileti tómendeıdi» dedi oftalmolog.

Gadjetterdi jaqyn qashyqtyqta uzaq ýaqyt qoldaný «qurǵaq kóz» sındromyn týdyryp, kóz bulshyq etterin sharshatyp, jaqynnan kórý qabiletin tómendetedi. «Qurǵaq kóz» sındromynyń qaýiptili – qajetti mólsherdegi jas bólinbegendikten, kóz sharaınasy qurǵap, jel, shań-tozań syndy syrtqy áserden qorǵaý qabileti joıylady. Munyń sońy soqyrlyqqa deıin soqtyrýy múmkin. Onyń alǵashqy belgileri – kózdik jıi jypylyqtaýy men jasaýraýy.

Mamandar jylyna bir ret dáriger-oftalmologtyń qaraýynda bolýǵa keńes beredi. Kompúter aldynda uzaq otyratyndar ár 20 mınýt saıyn kózin demaltyp turǵany jón. Kóz qyzaryp, shamadan tys jasaýrasa, kórý qabileti tómendegeni baıqalsa dereý dárigerge kóringen durys. Sondaı-aq kózildirikti bazar syndy oryndardan emes, maman keńesi boıynsha tapsyryspen alý kerek. Taǵy bir aıta keterligi, uıyqtar aldynda, qarańǵy jerde kompúter men smartfon qaramaǵan abzal. Bul uıqy fazasynyń buzylýyna soqtyrady.

Suńǵat Kópenovtyń aıtýynsha, Qazaqstanda kóz janaryn 45 jasqa deıin ǵana lazer kómegimen qalpyna keltirýge bolady. Biraq onyń ózindik qaýpi de joq emes. Baǵasy da qymbat! Sondyqtan kózińizdi kútińiz!