Batys Qazaqstan oblysy, Býrlınskıı aýdanyna qarasty Aleksandrovka aýylynyń ákimi Ganja Turǵanalıev qyzmettik kóligimen mas kúıinde júrgeni úshin qatań sógis aldy dep jazady Qamshy.kz aqparat agenttigi. 

30-shilde kúni oblystyq máslıhat ǵımaratynda BQO memlekettik qyzmetteri boıynsha kezekti Etıka keńesiniń otyrysy ótti. Atalǵan jıynda aýyl ákimine qatysty is talqyǵa salyndy.

4-mamyr kúni saǵat túngi 00:20 shamasynda polısıa qyzmetkerleri mas kúıinde kólik tizgindep kele jatqan Ganja Turǵanalıevti toqtatqan.

Al aýyl ákimi otyrysta óz kinásin moıyndap, keshirim surady.

«Qurmetti tóraǵalar jáne komısıa músheleri, men óz kinámdi moıyndaımyn, bul fakt ótirik emes. Tek men alkagoldi ishimdikti 2-mamyr kúni jumystan tys ýaqytta ishkenimdi jetkizgim keledi. Al 3-mamyr kúni tolyq jumysta boldym. Tústen keıin Aqsaı qalasyna bara jatqanda kólik buzyldy. Saǵat 6 shamasynda júrgizýshi úıine qaıtyp ketti. Men kólikti ózim jóndedim. Saǵat túngi 11 shamasynda jolǵa shyqtym. Sol jerde polısıa toqtatty. Saraptama barysynda mendegi ishimdik kórsetkishi 0,87 promıl kórsetti. Al 0,5 promıl – kólik tizgindeýge ruqsat beretin kórsetkish. Mende kópteý boldy. Kinámdi moıyndaımyn», - dedi Turǵanalıev.

 Aıta ketý kerek, ákim memlekettik qyzmette 21 jyl tájirıbesi bar azamat. Al Aleksandrovka aýylynyń ákimi qyzmetin 2018 jyldyń qazanynan bastap atqaryp keledi.

Etıkalyq keńes tóraǵasy Bolat Isakov ákimnen 2-mamyr kúni qansha ishkenin surady.

«Demek, 3-mamyr kúni siz jumysta mas kúıińizde boldyńyz ba?» - dep surady Isakov.

Al Turǵanalıev óziniń saý ekenin, tek ishimdiktiń ıisi shyǵyp turǵanyn aıtty.

Atalǵan áreketine Turǵanalıev qatań sógis alyp, kólik júrgizý quqyǵynan úsh jylǵa aıyryldy.