Basqosýda halyqtyń ál-aýqat deńgeıin arttyrý máseleleri jan-jaqty talqylandy. Búginnen, ıaǵnı 1-shildeden bastap oblystaǵy 47 myń búdjet salasy qyzmetkerleriniń jalaqysy 30%-ǵa artty. Osy maqsatta respýblıkalyq búdjetten 6 mlrd.teńge bólingen.

Sonymen qatar, «Baqytty otbasy» jobasy aıasynda az qamtylǵan kópbalaly otbasylaryna 100 myń teńge mólsherinde bir jolǵy kómek tólenip bastady. Bul joba jyl sońyna deıin jalǵasyn tappaq. Sondaı-aq, 20 myńnan astam kópbalaly analar qoǵamdyq kólikte tegin júrýmen qamtamasyz etildi.

Óńirde az qamtylǵan otbasylarynan shyqqan múgedek balalar úshin ońaltý sharalarynyń 2-shi kýrsyn tóleý qarastyrylyp, oǵan búdjetten 50 mln.teńge qarjy josparlanǵan. Sonymen qatar, múgedek balalar úshin Nur-Sultan jáne Almaty qalalaryndaǵy respýblıkalyq klınıkalarǵa avıa kóligimen jol aqysyn tóleý qarastyrylǵan. Búgingi tańda 51 balaǵa tólem júrgizildi. Aldaǵy ýaqytta múmkindigi shekteýli balalar úshin arnaıy toptar ashý josparlanyp otyr.

Jıyn barysynda óńirdegi sanıtarlyq-epıdemıalogıalyq jaǵdaı týraly da sóz qozǵaldy. Aıta keteıik, Mańǵystaý oblysynyń aýmaǵynda 2019 jyldyń 5 aıynyń qorytyndysy boıynsha asa qaýipti jáne karantındi ınfeksıalar tirkelmegen. Aımaq basshysy osy tarapta óńirdegi tazalyqty jiti qadaǵalaýdy tapsyrdy.

Shomylý maýsymy ashylǵaly beri oblysta birneshe jaǵdaı oryn alǵan bolatyn. Aldaǵy ýaqytta osy máselelerdi boldyrmaý, halyqtyń qaýipsizdigin nyǵaıtý maqsatynda óńir basshysy Serikbaı Ótelgenuly turǵyndar kóp jınalatyn oryndarǵa qutqarýshy toptardyń kezekshilikpen qyzmet etýin tapsyrdy.