QR ındýstrıa jáne ınfraqurylymdyq damý vıse-mınıstri Amanıaz Erjanov memlekettik qyzmetkerler úshin sheteldik avtokólik satyp alýǵa, sondaı-aq shetelden transformator men kabel ákelýge tyıym salynatynyn aıtty dep jazady Qamshy.kz aqparat agenttigi Sputnik Qazaqstan saıtyna silteme jasap.

Vıse-mınıstr qaýly ótken aptada qabyldanǵanyn jetkizdi.

"Qujattaǵy tizimge avtomobıl, transformator, kabel kirdi. 3 qaýymdastyq osy erejeni engizýge usynys jasady. Qaýly aıasynda 2 jyl boıy memlekettik satyp alýlar boıynsha tek otandyq ónimder alynýy qajet", - dedi Amanıaz Erjanov úkimettiń baspasóz ortalyǵynda ótken baspasóz konferensıasynan soń.

Onyń pikirinshe, atalǵan shara osy salada jumys isteıtin otandyq kásiporyndardyń damýyna yqpal etedi.

"Búgin kabel ónimin shyǵarý 80%-ke ósti. Qaraǵandy, Pavlodar, Atyraýdaǵy kásiporyndar talshyqty-optıkalyq kabel júrgizýge qajetti ónimdi shyǵara alady. Bul ónimdi "Qazaqtelekom" kompanıasy paıdalanyp jatyr. Al osyǵan deıin ımporttyq ónimder jáne transformatorlar, avtomobılder shetelden satyp alynyp keldi", - deıdi vıse-mınıstr.

Taǵy oqyńyz: Júrgizýshiler nege ózge eldiń nómirin Qazaqstanda tirkegisi kelmeıdi

Jýrnalıser vedomstvo ókilinen qazirgi kezde nemis kóligimen júretin memlekettik qyzmetshiler, onyń ishinde mınıstrler qandaı otandyq ónimdi paıdalanatynyn surady.

Amanıaz Erjanov elimizde Ravon, KIA, SsangYong kólikteri qurastyrylatynyn atap ótti. Eki jyldyq tyıym kezinde memlekettik qyzmetkerler osy modelderdi satyp alady eken.

"Mınıstrler Mercedes-pen júredi dep mysqyldaýǵa bolmaıdy. Ol "Mersedester" buryn satyp alynǵan, olarǵa 10-15 jyl bolǵan", - dep jaýap berdi vıse-mınıstr.

Erjanov shetelden avtokólik ákelýdi shekteý elimizdegi kólik naryǵyndaǵy baǵalarǵa áser etpeıtinin aıtty.

"Avtokóliktiń baǵasy arzandamaıdy. Sebebi, kez kelgen ónimdi shyǵarý kezinde shyǵyn bolady. Mysaly, avtobólshekter, shıkizattardyń óz baǵasy bar. Ónimniń baǵasy shyǵynnyń esebinen quralady", - dep túsindirdi ol.

Onyń aıtýynsha, baǵa óndiris elimizde bolǵanda, bólshekterdiń 50%-i Qazaqstanda jasalǵanda tómendeýi múmkin. Oǵan 3-5 jyl ýaqyt kerek.

"Onyń ózinde bul qarjylandyrý kózine jáne memlekettiń óndiriske qandaı jaǵdaı jasaıtynyna baılanysty", - dep túıindedi vıse-mınıstr.