Atyraýdaǵy Teńiz kenishindegi atyshýly daýdan soń 200-ge jýyq jumysshy aıaq-asty jumyssyz qalyp, taǵy dúrlikti, dep habarlaıdy Qamshy.kz aqparat agenttigi "Birinshi Eýrazıa" telearnasyna silteme jasap.

"Eldi dúr súlkindirgen Teńiz kenishindegi daýdan keıin keıbir qyzmetkerlerge demalys berilip, jumys ýaqytsha toqtatylǵan bolatyn. Sol kezde Atyraý oblysynyń ákimi Nurlan Noǵaev jurtqa bárin óz baqylaýynda ustaýǵa ýáde etken edi. Alaıda, kompanıa qyzmetkerleri jumysshylarǵa habarlasyp, kelisimsharttyń buzylǵanyn habarlaǵan. Sóıtip 200-ge jýyq adam syrttaı jumystan qýylyp, abdyrap qalǵan", - deıdi telearna tilshisi.

"Shok bolyp qaldyq. Kredıtimiz bar, bala-shaǵamyz bar. Bulaı bir kúnde qysqartyp jiberýge olardyń qaqysy joq qoı. Aldyn ala eskertip aıtýy kerek. Biz jumys izdeıtin edik. Óıtken joq bular", - dedi Jetkerbaı Kúlimjaıov.

Jumyssyz qalǵandar ózderin oblys ákimi "laqtyryp" ketti dep esepteıdi. Óıtkeni olar osy kúnge deıin sol kisiniń sózine senip kelgen.

"Jumystan shyǵasyńdar degen áńgime bolǵan joq. Álgi shý shyqqan kezde oblys ákimi Nurlan Noǵaev kelgen. Ózi aıtty sol kisiniń: "Qoryqpańdar, eshqandaı jumystan qysqartý degen bolmaıdy" degen. Qaıda sol sózi ákimniń", - deıdi jumyssyz qalǵan Jasulan Qabdeshev.

Olardyń aıtýynsha, basqa fırmalarǵa osy kompanıa ketirgen jumysshylardy "jumysqa qabyldamańdar" dep te buıyryp qoıǵan kórinedi. Sondaı sybys ta bar.

Al eńbek ınspeksıasy jumys berýshilerdiń bul áreketi zańdy degenge keltiredi.

Jumysshylardyń kelisimsharttary belgili bir jumystyń aıaqtalýyna deıin jasalǵan. Eger de ol jumystyń aıaqtalatyn ýaqyty kelgen jaǵdaıda jumys berýshi eńbek shartyn buzýǵa quqyly, – deıdi Atyraý oblysy memlekettik eńbek ınspeksıasynyń bólim basshysy Kemel Imanǵalıev.

Dese de, bir kúnde nápaqasynan aırylǵan jumysshylar munyń zańdy ekenimen esh kelispeıdi. Sondyqtan bul máselege oblys ákimdiginiń aralasýyn suraıdy.

Eske salsaq, onyń aldynda WhatsApp-ta taraǵan qazaq qyzy men Lıvıa azamatynyń sýreti úshin Atyraýda munaıshylar kóteriliske shyqqan bolatyn.