Shyǵys Qazaqstanda elimizdiń jáne sheteldiń velosportshylary synǵa túsken "Qazaqstan oqýshysy – 2019" halyqaralyq velokópkúndigi shymyldyq túrdi. Dúbirli doda bıyl elýinshi ret ótkizilip otyr.

Toǵyz kúnge sozylatyn sporttyq is-sharany oblys ákimdiginiń qoldaýymen Bilim jáne ǵylym mınıstrliginiń ulttyq ǵylymı-praktıkalyq dene tárbıesi ortalyǵy uıymdastyrǵanyn aıta ketken jón.

– Olımpıada chempıony Aleksandr Vınokýrov sporttyq mansabyndaǵy alǵashqy júldesin osy "Qazaqstan oqýshysy" jarysynda enshiligen edi. Sol aǵalaryńnyń jolyn bersin. Senderdiń aralaryńnan da bolashaq Olımpıada, Álem chempıondary shyǵady dep senemiz, – dedi jarystyń ashylý rásiminde Bilim jáne ǵylym mınıstrliginiń ulttyq ǵylymı-praktıkalyq dene tárbıesi ortalyǵynyń ókili Saǵdat Sadyqov.

1970 jyly Almatyda bastaýyn alǵan "Qazaqstan oqýshysy" velobáıgesi jyl saıyn ótkizilip keledi. Osy ýaqyt aralyǵynda saıysqa jeti myńǵa jýyq sportshy qatysqan eken. Bul jolǵy velobáıgege 130-ǵa jýyq oqýshy baq synaýda. Olardyń qatarynda Reseı, Ózbekstan sıaqty kórshiles memleketterden, alystaǵy Monako Knázdiginen ókilder bar.

Esterińizge salaıyq, atalmysh jarys 8-16 tamyz aralyǵynda Glýbokoe, Ulan aýdandary men Rıdder, Óskemen qalalarynyń joldarynda ótýi tıis. Jarys jeńimpazdary men júldegerleri apta sońynda belgili bolady.