"Álpınıser boıynsha: keshe 14 tamyzda álpınıser Jeńis shyńyna deıin shyqqanymen, 15 tamyzda qar boranyna tap bolǵany habarlanǵan bolatyn. Alpınısterdiń biri qaıtys bolyp, ekeýi kómek suraǵan. Atalǵan taý shyńy Qyrǵyzstan aýmaǵynda ornalasqandyqtan, eki kún buryn qutqarý operasıasy qolǵa alynyp, qyrǵyz shekarashylarynan áýe keńistigin paıdalaný ruqsaty alynǵan. Alaıda bizdiń qutqarýshy tikushaq qatty borannyń saldarynan bıikke kóterile almady. Búgin jergilikti ýaqyt boıynsha saǵat 10.00-de qutqarý operasıasy qaıta jandandy. Bortta tájirıbeli qutqarýshylar barshylyq. Tikushaq taýly aımaqqa barynsha beıimdelgen", – dedi Erlan Turǵymbaev Úkimet otyrysynan keıin tilshilerdiń suraǵyna jaýap bere otyryp.

Dese de, mınıstrdiń aıtýynsha, teńiz deńgeıinen 6 myń metr bıiktikke áýe kemeleriniń kóbi kóterile almaıdy.

"Áýe kemeleri barynsha bıikke kóterilip, qutqarýshylar izdestirý jumysyn jalǵastyrady. Eń qıyny, álpınıserdiń naqty qaı jerde ekenin bile almaı otyrmyz. Sondyqtan, barynsha aýqymdy izdestirý jumystaryn qolǵa alamyz. Qazir biz GPS arqyly joq degende boljamdy oryndardy anyqtaý úshin arnaıy qyzmetterdi iske tartyp jatyrmyz", – dedi ol.

Eske salsaq, almatylyq álpınıser toby Qyrǵyz taýlarynda joǵalǵan. Almaty qalasynyń ákimi Baqytjan Saǵyntaev taýda qazaqstandyq álpınıser tobynyń joǵalyp ketýine qatysty Instagram paraqshasynda alańdaýshylyq bildirdi. Keıinirek joǵalǵan álpınıserdiń biriniń qyzy áleýmettik jeli arqyly qalyń kópshilikten kómek surady. Sondaı-aq, QR Qorǵanys mınıstrligi álpınıserdi qutqarý operasıasyn bastady.

Álı Bekenuly

QazAqparat