–"Nur Otan" strategıalyq baǵyttan aýytqymaýy úshin búkil qoǵamdy jumyldyrýy tıis. Bul týraly "Nur Otan" partıasy Saıası keńesiniń keńeıtilgen otyrysynda QR Tuńǵysh Prezıdenti – Elbasy Nursultan Nazarbaev aıtty, dep habarlaıdy Qamshy.kz aqparat agenttigi.

"Partıamyz damýdyń jańa kezeńine kelip otyrǵanyn bárimiz túsinip, bilip otyrmyz. Zaman ózgerdi, jaǵdaı ózgerdi. "Nur Otan" elimizdiń jetekshi kúshi retinde saıası basshylyqty bekemdep, strategıalyq baǵyttan aýytqymaýy úshin búkil qoǵamdy jumyldyrýǵa tıis. Bul qur ásheıin aıtylǵan sóz emes. Biz Qazaqstannyń, halyqtyń ortasyndaǵy eldi jeteleıtin, elge túsindiretin uıymbyz. Eger ondaı róldi oryndamasaq, onda bizdiń ornymyzǵa basqa partıa keledi. Sondyqtan jaýapkershilikti naqty túsinýimiz kerek", – dedi QR Tuńǵysh Prezıdenti.

Osy rette Elbasy partıanyń 2050 jylǵa deıin qabyldanǵan baǵdarlamasynda Qazaqstannyń damyǵan 30 eldiń qataryna kirý maqsaty qoıylǵanyn eske salyp ótti.

"Barlyq baǵdarlamalar soǵan baılanysty. Sol maqsatqa jetý úshin jasap jatyrmyz. Zaman talap etti. Indýstrıalyq, ınfraqurylymdyq baǵdarlamalar, aýyl sharýashylyǵy, úı qurylysy, medısına, halyqty aǵartý jumystarynyń barlyǵy bir múddege jetý máselesi. Barlyǵymyzdyń oıymyz osy maqsatqa jetý bolýy kerek", – dedi Nursultan Nazarbaev.

QR Tuńǵysh Prezıdenti 2015 jyldan bastap 5 ınstıtýttyq reforma júzege asyrylyp jatqanyn aıtty.

"Esterińizge sala keteıin, bul zań ústemdigi, ártaraptandyrýǵa negizdelgen ekonomıkalyq ósim, bolashaǵy bir ult, transporentti ári esep beretin memleket. Bes baǵdarlama degen osyǵan baılanysty. 2017 jyly Parlament pen Úkimetti kúsheıtý úshin bılik tarmaqtary arasynda ókilettikterdi qaıta qarap, saıası júıeni jańǵyrttyq. 2018 jyly saılaý zańnamasyn jetildirdik. Máslıhattardyń kelesi saılaýy alǵash ret partıalyq tizim boıynsha ótkizileıin dep otyr", – dedi Elbasy.

Marlan Jıembaı

inform.kz