Qazaqstannyń burynǵy prezıdenti, eldegi bılik partıasy sanalatyn "Nur Otan"-nyń tóraǵasy Nursultan Nazarbaev barlyq saılaýlar konstıtýsıalyq merzimde ótetin aıtty dep jazady Qamshy.kz aqparat agenttigi. Bul Nazarbaev Nur-Sultanda ótip jatqan  "Nur Otan" partıasy Saıası keńesiniń keńeıtilgen otyrysynda aıtqan. 

Nazarbaevtyń aıtýynsha, demonstrasıa men sherýler eldegi tártipti buzyp, ózekti máselelermen aınalysý shette qalady.

"Postkeńestik elderden bastap Afrıkaǵa deıingi elderdi qarap kórińiz. Saıası turaqsyzdyq kezinde birinshi kezekte kim zardap shegedi? Ekonomıka qulaǵandyqtan, halyqtyń ómir súrý sapasy da tómendeıdi. Jumys isteýge ýaqyt joq – shýlap, ortaǵa shyǵady. Demonstrasıa men sherýler. Tártip pen bılik joq jerde – problema sheshilmeıdi. Árbir adamnyń qaýipsizdigi, eldiń turaqtylyǵy buzylady. Ózekti máselelermen aınalysý shette qalady. Árqashan shýlap júretin adamdarǵa taǵy da bir aıta keteıin, barlyq saılaýlar konstıtýsıalyq merzimde ótetin bolady. Osy taqyrypty jabaıyq", - dedi Nazarbaev.

Qazaqstanda 2019 jyldyń 9 maýsymynda kezekten tys prezıdent saılaýy ótken. Oǵan deıin de birneshe prezıdenttik jáne parlamenttik saılaýlar merziminen buryn bolǵan. Sondyqtan qazir kóptegen saıası sarapshylar bılik jaqyn arada parlament saılaýyn da merziminen buryn ótkizedi degen pikirler aıtyp júr.

Nur-Sultan qalasynda Nursultan Nazarbaevtyń tóraǵalyǵymen "Nur Otan" partıasy saıası keńesiniń keńeıtilgen otyrysy ótip jatyr.