"Máslıhattyń kelesi saılaýy Májilistegideı partıalyq tizimmen  ótedi". Bul týraly "Nur Otan" partıasy Saıası keńesiniń keńeıtilgen otyrysynda QR Tuńǵysh Prezıdenti – Elbasy Nursultan Nazarbaev aıtty, dep habarlaıdy Qamshy.kz aqparat agenttigi.

"2018 jyly saılaý zańnamasyn jetildirdik. Máslıhattardyń kelesi saılaýy alǵash ret partıalyq tizim boıynsha ótkizileıin dep otyr. Máslıhattyń kelesi saılaýy Májilistegideı partıalyq tizimmen ótedi. Jekelegen oponentterdiń nemese blogerlerdiń merziminen buryn Parlament saılaýynyń jáne basqalarynyń majorıtarlyq júıesine oralýdy usynyp jatqanyn estip otyrmyz. Búgin mundaı sóz sóıleýshilerge jaýap berý qajet", – dedi Elbasy.

Qazaqstan Tuńǵysh Prezıdenti saılaýdyń majorıtarlyq júıesin kóshýdi qoldap júrgenderdiń naqty usynystary joq ekendigin basa aıtty.

"Bul jerde negizdi argýmentteri joq, ádettegideı tek qana áńgime ǵana. Bılikti synap sóılegenderi bos sóz ǵana. Tym bolmasa bireýi qalaı isteý kerektigin usynyp, qalaı jasaý kerektigin kórsetse ǵoı. Demokratıanyń shamshyraǵy dep júrgen Eýropadaǵy 30 damyǵan eldiń qataryna kiretin memleketterdiń 63 paıyzy saılaýdy proporsıonaldy júıemen ótkizedi", – dedi Nursultan. Nazarbaev.

Elbasynyń aıtýynsha, majorıtarlyq júıedegi saılaý negizinen Azıa elderine tán bolyp keledi.

"Iaǵnı, proporsıonaldy júıe úzdik álemdik demokratıalyq tájirıbege tolyq saı keledi. Saıası júıeni nyǵaıtýǵa, demokratıany damytýǵa septigin tıgizip, tolyqtaı alǵanda sasıa partıanyń qyzmetin jandandyrady", – dedi elimizdiń Tuńǵysh Prezıdenti.

Marlan Jıembaı

inform.kz