1 maýsymnan bastap búgingi kúnge deıin "Jasyl el" jasaǵy aıtarlyqtaı nátıjelerge qol jetkizdi. Atap aıtsaq, 25-ten astam ekologıalyq aksıa uıymdastyryp, oblys aýmaǵynan 180 tekshe metr qoqys shyǵarǵan, sodaı-aq, 9 000-nan astam aǵashty sýaryp retke keltirdi, – dep habarlaıdy Atyraý oblysynyń Óńirlik komýnıkasıalar qyzmeti.

Aǵymdaǵy jyldyń maýsym-shilde aılarynda 2 000-nan astam sarbaz qala men oblys aýdandarynyń aýmaǵyndaǵy 1467 gektar jerdi tazalady. Budan bólek, kúzgi maýsymda "Jasyl el" sarbazdary munaıly ólkeni kógaldandyrý boıynsha keń aýqymdy jumystardy josparlap otyr.

– "Jasyl el" jasaǵy 1 maýsymnan 31 qazanǵa deıin jumys jasaıdy. Qazirgi ýaqytta jastar eldimekenderdi abattandyrý, jasyl jelekterdi kútý, sýarý boıynsha jumystar júrgizip jatyr. Barlyǵy 2 200 sarbaz bar, olardyń 199-i kúzgi maýsymda jumys jasaıtyn bolady. Jastar kóshetterdi otyrǵyzý boıynsha eńbek etedi, – deıdi "Jasyl el" jastar eńbek jasaǵynyń basshysy Abylaı Qurmetuly.