Búgin Májilis Tóraǵasy Nurlan Nyǵmatýlın «Nur Otan» partıasy fraksıasynyń alǵashqy otyrysyn ótkizdi dep habarlaıdy Qamshy.kz aqparat agenttigi Májilistiń Baspasóz qyzmetine silteme jasap.

Bul týraly Májilis Tóraǵasy óziniń tvıtterinde: «Májilistegi Nur Otan partıasy fraksıasynyń alǵashqy otyrysyn ótkizdim. Áriptestermen Elbasy N.Á.Nazarbaev tapsyrmalaryn oryndaý josparyn belgiledik. Basty maqsat-jumysta jańa tásil engizý, halyq máselelerin sheshý, saılaýaldy baǵdarlamany oryndaý,sonyń ishinde, zańdyq qamtamasyz etý» - dep jazdy.  

«Nur Otan» partıasynyń Saıası keńesiniń keńeıtilgen otyrysynda partıa Tóraǵasy, Qazaqstannyń Tuńǵysh Prezıdenti Nursultan Nazarbaev Májilistegi  fraksıanyń laýazymyna Palata Spıkeri Nurlan Nyǵmatýlındi usynǵan bolatyn.

Osyǵan oraı, «Nur Otan» partıasy fraksıasynyń otyrysynda partıa Tóraǵasy, Elbasy Nursultan Ábishuly Nazarbaevqa ózine zor senim artqany úshin alǵys bildirgen Nurlan Nyǵmatýlın fraksıadaǵy barlyq áriptesterine qoldap daýys bergeni úshin rahmetin aıtyp, bul úlken jaýapkershilik ekenin jetkizdi.

Nurlan Nyǵmatýlın nurotandyq depýtattardyń aldaǵy ýaqyttaǵy jumysy týraly aıta kele, fraksıa óziniń kúsh-jigerin, eń aldymen, partıa Tóraǵasy Nursultan Nazarbaevtyń tapsyrmalaryn, «Nur Otan» partıasynyń saılaýaldy tuǵyrnamasy men Memleket Basshysy Qasym-Jomart Toqaevtyń saılaýaldy baǵdarlamasynyń oryndalýyn baqylaýǵa jumyldyratynyn atap ótti.

Barshańyz jaqsy bilesizder, elimiz damý jolynda árbir kezeńde, árbir ýaqytta – «Nur Otan» partıasyna zor jaýapkershilik júktelip keledi. Keshe ǵana Nursultan Ábishuly «Nur Otan» partıasy Saıası Keńesiniń keńeıtilgen otyrysynda damyǵan 30 eldiń qataryna jetý týraly taǵy da atap ótti. Osy  jolda partıamyzdyń aldynda  turǵan úlken  mindetterge nazar  aýdardy. Sonymen birge, partıamyzdyń Májilistegi fraksıasy jumysyn kúsheıtýge erekshe kóńil  bóldi, - dedi N. Nyǵmatýlın.

Aldaǵy ýaqytta fraksıa depýtattary Úkimetpen birge partıa tuǵyrnamasynyń árbir tarmaǵy qalaı júzege asyrylyp jatqanyn jete taldap, fraksıanyń qatysýymen Úkimettiń keńeıtilgen otyrysynda halyqtyń naqty máselelerin sheshýge nazar aýdaratyn bolady.

Fraksıa otyrysynda N.Nyǵmatýlın áriptesterin zań shyǵarý bastamasyn belsendi paıdalanýǵa shaqyrdy. Depýtattyq zań jobalardy ázirleý barysynda partıa janyndaǵy Qoǵamdyq saıasat ınstıtýty óz úlesin qosady.

Sondaı-aq, depýtattyq saýaldardy daıyndaý barysynda aldymen saılaýshylardy tolǵandyrǵan máseleler, sonymen birge partıanyń saılaýaldy tuǵyrnamasyn iske asyrýǵa jete kóńil bólinedi.

Taǵy bir negizgi baǵyt - sybaılas jemqorlyqqa qarsy kúresti kúsheıtý. Osy baǵytta ozyq tájirıbelerdi eskere otyryp, júıeli jumystar júrgiziledi.

Elbasynyń ekonomıkalyq ósýdi qamtamasyz etýge qatysty qoıǵan  mindetterin tabysty oryndaý úshin N.Nyǵmatýlın ekonomıka, áleýmet, búdjet, jastar saıasaty, ınovasıa jáne t.b. baǵyttar boıynsha Úkimetpen birge jumys isteıtin naqty depýtattardy bekitýdi usyndy.

İs-sharada Úkimetpen ózara is-qımyl týraly aıtqan  Nurlan Nyǵmatýlın jumystyń tásilderi ózgeretinin aıtty.

Mysaly, jańa tásil boıynsha Úkimet saǵattarynda mınıstrlerdiń salaǵa qatysty jalpy jumys jaǵdaıy emes, naqty bir memlekettik baǵdarlamanyń oryndalýy baıandalyp, atqarylǵan jumystar talqylanatyn bolady.

Nátıjesinde baǵdarlamany iske asyrýdy jaqsartý boıynsha usynystar ázirlenedi. Sondaı-aq, qajet bolǵan jaǵdaıda laýazymdy tulǵalardyń jeke jaýapkershiligi de qaralatyny aıtyldy.

- Mınıstrlerdiń barlyǵy bizdiń partıamyzdyń músheleri «Úkimet saǵaty» aıasynda ǵana emes, «Nur Otan» partıasy fraksıasynyń otyrystarynda da esep berýi kerek», - dedi N. Nyǵmatýlın.

Nurlan Nyǵmatýlın depýtattarǵa áleýmettik jelilerdi belsendi qoldanyp, saılaýshylarmen tyǵyz baılanysta bolýǵa, zań shyǵarýshylyq jumystaǵy jańalyqtar týraly aıtyp, halyqtyń pikirlerin bilýge jáne ony kúndelikti jumysta paıdalanýǵa shaqyrdy.

Budan bylaı fraksıa músheleri de depýtattyq tósbelgimen birge partıalyq tósbelgini taǵyp júretin bolady.