1. Qazaqstan Respýblıkasy Prezıdentiniń janyndaǵy Jastar kadr rezervi jónindegi ulttyq komısıa (budan ári – Ulttyq komısıa) qurylsyn.

2. Qosa berilip otyrǵan:

1) Ulttyq komısıa týraly ereje;

2) Ulttyq komısıanyń quramy;

3) Prezıdenttik jastar kadr rezervin qalyptastyrý qaǵıdalary bekitilsin.

3. Osy Jarlyq alǵashqy resmı jarıalanǵan kúninen bastap qoldanysqa engiziledi.

Qazaqstan Respýblıkasynyń

Prezıdenti                                                                                       Q.Toqaev

Nur-Sultan, Aqorda, 2019 jylǵy  27 tamyz

 №141

Qazaqstan Respýblıkasy
Prezıdentiniń

2019 jylǵy  27 tamyzdaǵy

№  141  Jarlyǵymen
BEKİTİLGEN

Qazaqstan Respýblıkasy Prezıdentiniń janyndaǵy

Jastar kadr rezervi jónindegi ulttyq komısıa týraly

EREJE

 1. Jalpy erejeler

1. Qazaqstan Respýblıkasy Prezıdentiniń janyndaǵy Jastar kadr rezervi jónindegi ulttyq komısıa (budan ári – Ulttyq komısıa) Prezıdenttik jastar kadr rezervin (budan ári – Rezerv) qalyptastyrý maqsatynda qurylady.

2. Ulttyq komısıa óz qyzmetinde Qazaqstan Respýblıkasynyń Konstıtýsıasyn, Qazaqstan Respýblıkasynyń zańnamalyq aktilerin, Qazaqstan Respýblıkasy Prezıdentiniń aktilerin jáne osy erejeni basshylyqqa alady.

 2. Ulttyq komısıanyń mindetteri

 3. Ulttyq komısıanyń mindetteri:

1) Rezervti qalyptastyrý boıynsha jumysty jalpy úılestirý;

2) Rezervke alý týraly máselelerdi sheshý;

3) Rezervti qalyptastyrý máseleleri boıynsha Qazaqstan Respýblıkasy Prezıdentiniń tapsyrmalaryn oryndaýdy qamtamasyz etý bolyp tabylady.

3. Ulttyq komısıanyń fýnksıalary

 4. Ulttyq komısıaǵa mindetterine sáıkes mynadaı fýnksıalar júkteledi:

1) Rezervke alýǵa usynylǵan kandıdattardy qaraý;

2) Ulttyq komısıanyń quzyretine kiretin máseleler boıynsha memlekettik organdardan jáne ózge de uıymdardan aqparat suratý jáne alý;

3) Ulttyq komısıanyń quzyretine kiretin máseleler boıynsha sheshimder qabyldaý.

 4. Ulttyq komısıanyń quqyqtary

 5. Ulttyq komısıa óz mindetterine sáıkes mynadaı quqyqtarǵa ıe:

1) Ulttyq komısıanyń quzyretine kiretin máselelerdi qaraýǵa memlekettik organdardyń, uıymdardyń laýazymdy adamdary men mamandaryn tartý;

2) Ulttyq komısıanyń otyrysyna Ulttyq komısıanyń músheleri bolyp tabylmaıtyn laýazymdy jáne ózge de adamdardy, sondaı-aq buqaralyq aqparat quraldarynyń ókilderin shaqyrý.

 5. Ulttyq komısıanyń quramy jáne qyzmetin uıymdastyrý

6. Ulttyq komısıa tóraǵadan, onyń orynbasarynan jáne komısıa múshelerinen turady.

7. Ulttyq komısıanyń tóraǵasy:

1) Ulttyq komısıanyń qyzmetine jalpy basshylyqty júzege asyrady;

2) Ulttyq komısıanyń otyrystaryn ótkizý orny men ýaqytyn aıqyndaıdy;

3) Ulttyq komısıanyń otyrystarynda tóraǵalyq etedi;

4) Ulttyq komısıanyń múshelerine oryndaýǵa mindetti nusqaýlar beredi.

8. Ulttyq komısıanyń tóraǵasy bolmaǵan ýaqytta, sondaı-aq onyń tapsyrmasy boıynsha onyń fýnksıalaryn komısıa tóraǵasynyń orynbasary oryndaı alady.

9. Ulttyq komısıanyń otyrystary qajettigine qaraı ótkiziledi.

10. Ulttyq komısıa tóraǵasynyń tapsyrmasy boıynsha Ulttyq komısıa músheleriniń syrttaı daýys berýi ótkizilýi múmkin.

Ulttyq komısıa músheleriniń syrttaı daýys berý merzimi Ulttyq komısıa múshelerine materıaldar jiberilgen kúnnen bastap úsh jumys kúninen aspaýy tıis.

Syrttaı daýys berý merzimi aıaqtalǵanǵa deıin Ulttyq komısıa músheleri óz pikirlerin Ulttyq komısıanyń jumys organyna jazbasha túrde joldaıdy.

Kórsetilgen merzimde jaýap usynylmaǵan jaǵdaıda Ulttyq komısıa múshesi sheshim jobasyn qabyldaýǵa daýys berdi dep sanalady.

11. Ulttyq komısıanyń otyrysy nemese syrttaı daýys berý onyń quramynyń jalpy sanynyń keminde úshten ekisi otyrysqa qatysqan nemese syrttaı daýys berýge qatysqan jaǵdaıda zańdy bolyp tabylady. Ulttyq komısıanyń músheleri otyrystarǵa jáne syrttaı daýys berýge aýysý quqyǵynsyz qatysady.

12. Ulttyq komısıanyń sheshimderi Ulttyq komısıa otyrysyna qatysýshy nemese syrttaı daýys berýge qatysýshy músheleriniń jalpy sanynyń qarapaıym kópshilik daýysymen ashyq daýys berý nemese syrttaı daýys berý arqyly qabyldanady. Daýystar teń bolǵan jaǵdaıda tóraǵanyń daýysy sheshýshi bolyp tabylady.

13. Ulttyq komısıanyń sheshimderi, oǵan Ulttyq komısıanyń tóraǵasy jáne hatshysy qol qoıatyn hattamamen resimdeledi.

Ulttyq komısıanyń sheshimderi tıisti memlekettik organdarǵa, uıymdarǵa jiberiledi jáne Ulttyq komısıa belgilegen merzimde mindetti túrde qaralýǵa tıis.

14. Ulttyq komısıanyń hatshysy Qazaqstan Respýblıkasy Prezıdent Ákimshiliginiń Memlekettik qyzmet jáne kadr saıasaty bóliminiń meńgerýshisi bolyp tabylady.

15. Ulttyq komısıanyń jumys organy Qazaqstan Respýblıkasy Prezıdenti Ákimshiliginiń Memlekettik qyzmet jáne kadr saıasaty bólimi bolyp tabylady.

Ulttyq komısıanyń qyzmetin uıymdyq qamtamasyz etýdi memlekettik qyzmet isteri jónindegi ýákiletti organ júzege asyrady.

 Qazaqstan Respýblıkasy
Prezıdentiniń

           2019 jylǵy 27 tamyzdaǵy

№  141  Jarlyǵymen
BEKİTİLGEN

Qazaqstan Respýblıkasy Prezıdentiniń janyndaǵy

Jastar kadr rezervi jónindegi ulttyq komısıanyń

QURAMY

Qazaqstan Respýblıkasynyń Prezıdenti Ákimshiliginiń Basshysy, komısıa tóraǵasy

Qazaqstan Respýblıkasy Prezıdenti Keńsesiniń bastyǵy, komısıa tóraǵasynyń orynbasary

Qazaqstan Respýblıkasynyń Memlekettik qyzmet isteri agenttiginiń tóraǵasy, komısıa tóraǵasynyń orynbasary

Qazaqstan Respýblıkasy Prezıdenti Ákimshiligi Basshysynyń óńirlik saıasat máselelerine jetekshilik etýshi orynbasary, komısıa múshesi

Qazaqstan Respýblıkasy Prezıdenti Ákimshiliginiń Memlekettik qyzmet jáne kadr saıasaty bóliminiń meńgerýshisi, komısıanyń hatshysy

 ___________________

Qazaqstan Respýblıkasy
Prezıdentiniń

          2019 jylǵy 27 tamyzdaǵy

№  141     Jarlyǵymen
BEKİTİLGEN

 Prezıdenttik jastar kadr rezervin qalyptastyrý

QAǴIDALARY

 1-taraý. Jalpy erejeler

1. Osy Prezıdenttik jastar kadr rezervin qalyptastyrý qaǵıdalary (budan ári – Qaǵıdalar) Prezıdenttik jastar kadr rezervin (budan ári – Rezerv) qalyptastyrý tártibin aıqyndaıdy.

2. Rezervke irikteýdi Qazaqstan Respýblıkasy Prezıdentiniń janyndaǵy Jastar kadr rezervi jónindegi ulttyq komısıa (budan ári – Ulttyq komısıa) júzege asyrady.

3. Rezervke otyz bes jastan aspaǵan, joǵarǵy bilimi jáne bes jyldan kem emes eńbek ótili bar Qazaqstan Respýblıkasynyń azamaty alynýy múmkin.

Qazaqstan Respýblıkasynyń Prezıdenti taǵaıyndaǵan memlekettik qyzmetshiler rezervke irikteýge qatysýǵa jiberilmeıdi.

4. Rezervke alynǵan adamdar mynadaı laýazymdar toptaryna ornalasa alady:

salalyq laýazymdardyń toby:

Qazaqstan Respýblıkasynyń mınıstrleri, olardyń birinshi orynbasarlary men orynbasarlary;

oblystardyń, respýblıkalyq mańyzy bar qalalardyń, astananyń ákimderiniń birinshi orynbasarlary men orynbasarlary;

ortalyq atqarýshy organdar komıtetteriniń tóraǵalary;

ulttyq basqarýshy holdıńter, ulttyq holdıńter, ulttyq kompanıalar basqarmalarynyń tóraǵalary jáne músheleri.

Salalyq laýazymdardyń toby qyzmettiń mynadaı baǵyttaryn qamtıdy:

ekonomıkalyq jáne qarjylyq saıasat;

áleýmettik saıasat;

ınfraqurylymdy jáne servıstik salalardy, ónerkásipti, aýyl sharýashylyǵy men qorshaǵan ortany qorǵaýdy damytý;

syrtqy jáne ishki saıasat;

quqyqtyq saıasat;

óńirlik laýazymdardyń toby:

oblystardyń, respýblıkalyq mańyzy bar qalalardyń, astananyń ákimderi;

oblystyq mańyzy bar qalalardyń, oblystar aýdandarynyń jáne qalalardaǵy aýdandardyń ákimderi;

basqarýshylyq laýazymdardyń toby:

ortalyq atqarýshy organdardyń jaýapty hatshylary;

Qazaqstan Respýblıkasy Konstıtýsıalyq Keńesi, Prezıdentiniń İs basqarmasy, Qazaqstan Respýblıkasy Ortalyq saılaý komısıasy, Respýblıkalyq búdjettiń atqarylýyn baqylaý jónindegi esep komıteti, Qazaqstan Respýblıkasynyń Memlekettik qyzmet isteri agenttigi apparattarynyń basshylary, Qazaqstan Respýblıkasynyń Joǵarǵy Soty janyndaǵy Sottardyń qyzmetin qamtamasyz etý departamentiniń (Qazaqstan Respýblıkasy Joǵarǵy Soty apparatynyń) basshysy;

Qazaqstan Respýblıkasy Joǵary Sot Keńesiniń hatshysy – Apparat basshysy;

jaýapty hatshy laýazymy engizilmegen ortalyq atqarýshy organdar apparattarynyń basshylary, Adam quqyqtary jónindegi ulttyq ortalyqtyń basshysy;

oblystardyń, respýblıkalyq mańyzy bar qalalardyń, astananyń ákimderi apparattarynyń basshylary.

Osy tarmaqta atalǵan laýazymdarǵa taǵaıyndaýlar Rezervke alynǵan adamdardyń qatarynan, sondaı-aq Qazaqstan Respýblıkasynyń zańnamasynda belgilengen tártippen ózge de adamdardyń qatarynan júzege asyryla alady.

5. Osy Qaǵıdalar Qazaqstan Respýblıkasynyń Qarýly Kúshterindegi, basqa da áskerleri men áskerı quralymdaryndaǵy, sondaı-aq «Qazaqstan Respýblıkasy quqyq qorǵaý jáne arnaýly memlekettik organdary basshylyǵynyń prezıdenttik rezervin qalyptastyrý týraly» Qazaqstan Respýblıkasy Prezıdentiniń 2013 jylǵy 28 tamyzdaǵy № 624 Jarlyǵyna sáıkes júzege asyrylatyn quqyq qorǵaý jáne arnaýly memlekettik organdarda basshy laýazymdarǵa ornalasý máselelerin rettemeıdi.

2-taraý. Rezervke irikteý

6. Rezervke irikteý birqatar dáıekti kezeńderdi qamtıdy:

1) Rezervke irikteýdi ótkizý týraly habarlandyrýdy jarıalaý;

2) kandıdattardyń qujattaryn qabyldaý;

3) kandıdattardyń teorıalyq bilimin testileý (budan ári – testileý);

4) kandıdattardyń kóshbasshylyq qasıetterin, synı oılaýyn, strategıalyq kózqarasyn, motıvasıasy men qundylyqtaryn baǵalaý (esse jazý, jobalardy tanystyrý, ıntervúden ótý jáne memlekettik qyzmet isteri jónindegi ýákiletti organ aıqyndaıtyn baǵalaýdyń basqa quraldary) (budan ári – baǵalaý kezeńi);

5) Rezervke irikteý jónindegi sarapshylyq komısıada (budan ári – Sarapshylyq komısıa) kandıdattarmen áńgimelesý;

6) Sarapshylyq komısıa Rezervke alýǵa usynǵan kandıdattardy Ulttyq komısıanyń otyrysynda qaraý.

Rezervke irikteýdiń kezeńderi aqparattyq júıeler qoldaný arqyly júrgizilýi múmkin.

Rezervke irikteý kezeńderin ótkizý merzimderin Ulttyq komısıa aıqyndaıdy.

7. İrikteýdi júrgizý týraly habarlandyrý memlekettik qyzmet isteri jónindegi ýákiletti organnyń (budan ári – ýákiletti organ) ınternet-resýrsynda, sondaı-aq respýblıkalyq buqaralyq aqparat quraldarynda jáne basqa resýrstarda jarıalanady.

Habarlandyrý osy Qaǵıdalarda aıqyndalǵan Rezervke irikteýdiń tártibi týraly aqparatty, qujattardy tapsyrý merzimin qamtıdy.

8. İrikteýge qatysý úshin mynadaı qujattar usynylady:

1) jeke basty kýálandyratyn qujattyń kóshirmesi;

2) bilim týraly qujattyń kóshirmesi;

3) eńbek qyzmetin rastaıtyn qujattyń kóshirmesi.

Kandıdat qujattardy tapsyrý kezinde onyń derbes derekteri, bilimi men jumys tájirıbesi týraly málimetter, Rezervke alynǵan jaǵdaıda kandıdat úmittenetin laýazymdar toby, osy Qaǵıdalardyń 4-tarmaǵyna sáıkes salalyq baǵyt kórsetiledi.

Qujattarǵa myna adamdardyń bireýinen usynymhat qosa beriledi:

kandıdat jumys isteıtin nemese jumys istegen uıymnyń basshysynan;

ulttyq kompanıanyń, ulttyq holdıńtiń, ulttyq damý ınstıtýtynyń basqarma tóraǵasynan nemese onyń orynbasarynan;

memlekettik saıası qyzmetshiden;

ortalyq atqarýshy organnyń jaýapty hatshysynan, ortalyq nemese jergilikti memlekettik organnyń apparat basshysynan usynylady.

Qazaqstan Respýblıkasy Senatynyń, Májilisiniń depýtatynan, oblystyń, respýblıkalyq mańyzy bar qalanyń, astananyń máslıhat hatshysynan usynylady.

Usynymhat uıymnyń nemese laýazymdy adamnyń resmı blankisinde:

qol qoıylǵan kúni, kandıdattyń tegi, aty jáne jóni;

onyń kásibı jáne jeke qasıetteri aıqyndalǵan minezdemeler;

kandıdatpen yntymaqtastyqtyń uzaqtyǵy men jaǵdaılary kórsetile otyryp resimdeledi.

Qujattardy tapsyrǵan kezde kandıdat Rezervke irikteýden ótýdiń tártibimen tanysady, sondaı-aq irikteýdiń sharttaryn qatań saqtaý jáne ózi kórsetken málimetterdiń shynaıylyǵyn qamtamasyz etý boıynsha ózine mindetteme alady.

9. Testileýge osy Qaǵıdalardyń 3-tarmaǵynda kózdelgen talaptarǵa saı keletin kandıdattar jiberiledi.

Testileýdiń qorytyndysy boıynsha eń joǵary nátıjelerdi jınaǵan kandıdattar Rezervke irikteýdiń kelesi kezeńine jiberiledi.

Rezervke irikteýdiń kelesi kezeńine jiberiletin, eń joǵarǵy nátıjeleri bar kandıdattardyń shekti sanyn Ulttyq komısıa aıqyndaıdy.

Birneshe kandıdatta testileý nátıjeleri birdeı bolǵan kezde irikteýdiń kelesi kezeńine osy tarmaqtyń úshinshi bóligine sáıkes anyqtalǵan sanynan asatyn kandıdattardyń sanynyń ótýine jol beriledi.

Rezervke irikteýge qatysý úshin kandıdat ótinim bergen kezde usynǵan málimetter men qujattarǵa baǵalaý kezeńiniń aldynda tekserý júrgiziledi.

10. Baǵalaý kezeńinde kandıdattardy baǵalaý úshin ýákiletti organ salalyq  toptardy qurady.

Sheshimderdi qabyldaýdyń aıqyndyǵyn qamtamasyz etý úshin barlyq kandıdattardy baǵalaý kezeńinde qoǵamdastyqtyń ókilderi tartylýy múmkin.

Baǵalaý kezeńiniń qorytyndysy boıynsha eń joǵarǵy nátıjeler alǵan kandıdattar Sarapshylyq komısıada áńgimelesýge  jiberiledi.

Sarapshylyq keńeste áńgimelesýge ótkiziletin, eń joǵarǵy nátıjeleri bar kandıdattardyń shekti sanyn Ulttyq komısıa aıqyndaıdy.

Birneshe kandıdatta baǵalaý kezeńiniń qorytyndysy boıynsha birdeı nátıjeler bolǵan jaǵdaıda irikteýdiń kelesi kezeńine osy tarmaqtyń tórtinshi bóligine sáıkes anyqtalǵan sanynan asatyn kandıdattardyń sany ótýi múmkin.

11. Sarapshylyq komısıanyń quramyn Qazaqstan Respýblıkasynyń Prezıdenti Ákimshiligi aıqyndaıdy.

Sarapshylyq komısıanyń otyrysyna daıyndalý barysynda kandıdattar týraly málimetterdi, onyń ishinde tıisti memlekettik organdardan suratylatyn málimetterdi, sondaı-aq kandıdattardyń «Qazaqstan Respýblıkasynyń memlekettik qyzmeti týraly» Qazaqstan Respýblıkasy Zańynyń 16-baby 3-tarmaǵynyń talaptaryna sáıkestigin Ulttyq komısıanyń jumys organy nemese ýákiletti organ qaraıdy.

Áńgimelesýdiń qorytyndysy boıynsha irikteýdiń aldyńǵy kezeńderiniń nátıjelerin eskerýmen Sarapshylyq komısıa ashyq daýys berý arqyly Rezervke alýǵa usynylatyn kandıdattardyń tizimin jasaıdy jáne Ulttyq komısıanyń qaraýyna joldaıdy.

12. İrikteýge qatysýǵa bas tartýdyń negizi mynalar bolyp tabylady:

1) kandıdattyń kórineý jalǵan málimetti jáne qujattardy berýi;

2) kandıdattardyń «Qazaqstan Respýblıkasynyń memlekettik qyzmeti týraly» Qazaqstan Respýblıkasy Zańynyń 16-baby 3-tarmaǵynyń talaptaryna sáıkes emestigi.

13. Ulttyq komısıa Qazaqstan Respýblıkasy Prezıdentiniń sheshimimen jasaqtalady.

Ulttyq komısıa kandıdattardy bes jyl merzimge Rezervke alý týraly sheshim shyǵarady.

14. Ulttyq komısıanyń sheshimine sáıkes Rezervke alynǵan adamdar bólingen qarajat sheginde Qazaqstan Respýblıkasy Prezıdentiniń janyndaǵy bilim berý uıymynyń bilim berý baǵdarlamalary boıynsha qysqa merzimdi oqytý kýrstarynan óte alady.