Ulttyq ıdeologıany qalyptastyrý – zaman talaby. Al Ulttyq múddeni qalyptastyrý tól tilimizdi óristetýden bastaý alady. Bul týraly Ulttyq qoǵamdyq senim keńesiniń otyrysynda Qazybek Isa aıtty, dep habarlaıdy Qamshy.kz aqparat agenttigi.
Keńes múshesi memlekettik tildiń qoldanys aıasyn keńeıtý úshin memlekettik tildi mindetteıtin zań qabyldaý qajettigin atap ótti.
Sondaı-aq Ulttyq keńes múshesi Qazybek Isa «memlekettik til máselesin aldymen balabaqsha men mektep qabyrǵasynan bastaý» qajettigin aıtty.
–Mektebimizde shet tilin birinshi synyptan oqytý týraly keleshegimizge kesir keleńsizdikke burynnan qarsylyǵyn tanytyp kele jatqan Qazaqstan Prezıdenti Q. Toqaev muǵalimderdiń tamyz keńesinde bul máselege núkte qoıdy desek te bolady. Endi ata-analar qalaýymen shet tilin ekinshi-úshinshi synyptardan nemese besinshi synyptan keıin oqytý máselesi kún tártibine shyqty. Negizi bir toqtamǵa kelip, shet tilin bastaýysh synyptan keıin oqytý durys dep bilemiz, – dedi Ulttyq keńes múshesi, aqyn Qazybek Isa.
Ol Prezıdentke ǵana baǵynyshty memlekettik til agenttigin qurý máselesin kóterdi.
Qazybek Isa Ulttyq keńes otyrysynda Qasym-Jomart Toqaevtyń Qazaqstan Prezıdenti retinde Ulytaýǵa jasaǵan saparynyń tarıhı mańyzy zor bolǵanyn aıta kelip, Altyn Ordanyń 750 jyldyǵy men Joshy handy qasterleý úshin úlken mereıtoılyq shara ótkizýdiń máni bar ekenin aıtty.
–Memleket basshysynyń Ulytaý sapary men ulaǵatty sózderi rýhymyzdy kóterip, eńsemizdi bıiktetip ketti. Joshy hannyń Ulytaýda taqqa otyrǵanyna 2023 jyly 800 jyl tolady. Qazaq memleketi tarıhyndaǵy eldik mańyzy erekshe zor bul mereıtoı memlekettik deńgeıde toılanýy tıis! Mine, Qazaqstan Prezıdenti aıtqandaı, Joshy hanǵa álem nazaryn naǵyz aýdarar kezeń bastaldy deýge bolady.
Memleket basshysynyń Ulytaý sapary Ult rýhyn kóterer saıasat, ult múddesin ulyqtaıtyn keshendi sharalar kerektigin uqtyrýda. Bul bastamany qalyń el qýana qoldap jatyr. Tarıhymyzdyń tamyrynda jatqan Altyn Ordadaı aýqymy alyp, tereń taqyrypqa búkil halyq, barlyq qoǵamdyq-saıası qozǵalystar óz úlesterin qosýy tıis!, –dedi Qazybek Isa.
Joshy hannyń kıeli kesenesi men keleshek keremet kesheni álem saıahatshylaryn tartyp turar tarıhı da, tartymdy da, tamasha orynǵa aınalar edi Óıtkeni, Ulytaýda Uly Joshy handy ulyqtaý Altyn Ordany asqaqtatýǵa bastaıdy.
Ulttyq keńes múshesi Q. Isa sondaı-aq óz sózinde «qazaq tarıhyn naqty da, shynaıy derekter negizinde qaıta jazatyn ýaqyt kelgenin» aıtty.
Keńes múshesi latyn negizdi qazaq álipbıi máselesin de aınalyp ótpedi. Onyń aıtýynsha, álipbıdegi kemshilikter túzetilýi tıis. Máselen "İ" dybysynyń bas árpi "I" dybysy birdeı tańbalanady. Bul kóptegen shatasýshylyqqa urandyryp, "İ" dybysynyń joǵalýyna soqtyrady.
