Almaty qalasy ákimi apparatynyń Tilderdi damytý jáne latyn grafıkasyna kóshý ortalyǵy aǵymdaǵy jyldyń 18 qyrkúıeginde Qazaq ulttyq qyzdar pedagogıkalyq ýnıversıtetinde Qazaq tili álipbıin latyn grafıkasyna 2025 jylǵa deıin kezeń-kezeńimen kóshirý jónindegi is-sharalar josparyna sáıkes «Rýhanı jańǵyrý» baǵdarlamasy aıasynda «Jańa latyn álipbıin engizýdiń ǵylymı jáne uıymdastyrýshylyq máseleleri» taqyrybynda semınar-keńes (budan ári – Semınar-keńes) ótkizdi dep jazady Qamshy.kz aqparat agenttigi tilalemi.kz saıtynyń deregin negizge alyp. 

Semınar-keńestiń maqsaty men mindeti: jańa latyn álipbıin engizýdiń ǵylymı jáne uıymdastyrýshylyq máselelerin ǵylymı aýdıtorıada, kópshilik jıynda talqylaý, olardyń sheshý joldaryn qarastyrý jáne usyný, taqyrypqa qatysty ǵylymı jumystardyń nátıjesimen tanysý. Jańa latyn álipbıine birtindep kóshý máselelerine tarıhı sholý jasap,ǵylymı turǵyda taldaý jasaý jáne latyn álipbıin engizýdiń tıimdi sheshý joldaryn qarastyrý, kásibı bilikti mamandardyń pikirlerin toptastyrý, ǵylymı-zertteý mekemeleri men ortalyqtarynyń ǵylymı jumystaryn memlekettik til saıasatymen ózara sabaqtastyrý.

Semınar-keńeske qatysýshylar: qazaq álipbıin latyn grafıkasyna kóshirý jónindegi Ulttyq komısıanyń jáne onyń jumys toptarynyń músheleri, tanymal tilshi ǵalymdar, qazaq tili oqytýshylary, jas ǵalym doktoranttar men magıstranttar, memlekettik organdardyń til máselesine jaýapty mamandary, Úkimettik emes uıymdar men BAQ ókilderi jáne t.b. shaqyryldy.

Qatysýshylarǵa memlekettik til saıasatyna, tilderdi oqytýǵa baılanysty materıaldar taratyldy jáne belgilengen úlgidegi sertıfıkat berildi.