«Nur Otan» partıasy jarıalaǵan bastaýysh uıymdardyń rólin arttyrý, belsendiligin damytý maqsatynda, respýblıkalyq «Úzdik bastaýysh partıa uıymy» baıqaýy bıyl da óz jalǵasyn tabýda. Osyǵan oraı «Nur Otan» partıasy Baızaq aýdandyq fılıalynyń ǵımaratynda «Úzdik bastaýysh partıa uıymy» baıqaýynyń irikteý kezeńi bolyp ótti.

Úzdik bastaýysh partıa uıymyn anyqtaý, olardyń jumys tájirıbesin barlyq aımaqtarda taratý, partıalyq jáne saılanbaly qyzmetterge usyný maqsatynda bilikti jáne belsendi bastaýysh partıa uıymdary tóraǵalarynan partıalyq kadrlardyń rezervin qalyptastyrý jáne partıa jumysyna qoǵamdastyqtyń nazaryn aýdarý maqsatyn kózdegen baıqaýǵa oblystyq partıa fılıalynyń qoǵamdyq qabyldaý bóliminiń meńgerýshisi Úmit Ibraımova qatysty.

Atalmysh irikteý baıqaýyn «Nur Otan» partıasy aýdandyq fılıaly tóraǵasynyń birinshi orynbasary Sholpan Baıtaqova ashyp, júrgizip otyrdy. Baıqaý erejesine sáıkes, aýdandyq partıa fılıalynda arnaıy komısıa qurylyp, barlyq bastaýysh partıa uıymdarynyń tóraǵa - tóraıymdaryna baıqaý erejesi men talaptary tolyqtaı túsindirildi.

Baıqaýǵa qatysýshy bastaýysh partıa uıymdary óz jumystaryn slaıdtar arqyly tanystyrdy. Komısıa músheleri aldyn ala zerdelengen is qujattaryna baǵa bere otyryp, baıqaýdyń negizgi jeti krıterıılerine toqtaldy. Onyń ishinde, «BPU jetekshisin baǵalaý» baǵyty boıynsha qatysýshylarǵa partıanyń Jarǵysy men baǵdarlamalyq qujattaryn bilýlerin nazarǵa aldy. Komısıa músheleri baıqaý erejesiniń №2 qosymshasy, baǵalaý ádistemesine sáıkes, qatysýshylar baǵalaryn 1-den 5-ke deıin balmen baǵalady. Árbir komısıa múshesi baǵalaý paraǵyn jeke toltyrdy jáne sońynda óz qoldaryn qoıyp, komısıa hatshysyna tapsyryp otyrdy.

Arnaıy qurylǵan komısıa músheleri «Úzdik bastaýysh partıa uıymy» baıqaýynyń erejesine, partıalyq jobalardy iske asyrýy, ishkipartıalyq jumystary, jańa ádisterdi paıdalanýy, azamattyq bastamalardy iske asyrýy, bastaýysh partıa uıymy qyzmetin buqaralyq aqparat quraldarynda jarıalaýy, jastarmen jumysy, bastaýysh partıa uıymy jetekshisin baǵalaý ádistemesine sáıkes jeti baǵyt boıynsha jumys júrgizip, baıqaýǵa qatysýǵa usynym bildirgen bastaýysh partıa uıymdary arasynan jeńimpazdy anyqtady. Sonymen, komısıa músheleriniń qabyldaǵan sheshimimen múshe sany 100-ge deıingi «Qostóbe», múshe sany 500-ge deıingi «Mádenıet úıi», múshe sany 500 jáne odan astam partıa múshesi bar “Dana” bastaýysh partıa uıymdary birinshi oryndardy ıelenip, oblystyq ekinshi kezeńge joldama aldy.