«Kóknar» jáne «Dopıng» jedel-aldyn alý is-sharalary sheńberinde Túrkistan oblysy PD Esirtki bıznesine qarsy kúres basqarmasynyń qyzmetkerleri esirtkiniń zańsyz aınalymyna qatysty 62 qylmysty tirkedi. Onyń ishinde 18 esirtki zattaryn ótkizý jaıty, 3 asa iri kólemde esirtkini saqtaý men 38 esirtki ósimdikteriniń alqaby joıyldy dep jazady  Qamshy.kz aqparat agenttigi otyrar.kz saıtyna silteme jasap. 

Polısıa qyzmetkerlerimen tárkilengen esirtkiniń jalpy salmaǵy 6 tonnaǵa jýyq, onyń ishinde 5,5 kg-dan astamy geroın.

Atalǵan is-sharalardyń negizgi maqsaty esirtki quraldarynyń zańsyz aınalymymen baılanysty qylmystardyń aldyn alý jáne jolyn kesý, kúdiktilerdi esirtkini saqtaý men ótkizý kezinde ustaý, quramynda esirtkisi bar ósimdikterdiń zańsyz egilýi men esirtkini jetkizý arnalaryn jáne basqa da quqyq buzýshylyqtardy anyqtaý men joıý bolyp tabylady.

Mysaly, 17 qyrkúıek kúni Túrkistan oblysy PD EQQKB qyzmetkerleri jedel-izdestirý is-sharasy barysynda Saıram aýdanynyń turǵynyn ustady. Kúdiktini tintý kezinde jedel ýákilder marıhýanaǵa uqsas ósimdik tektes esirtki zatyn tapty. Odan ári ustalǵan kúdiktiniń úıinde taǵy birneshe polıetılen paketter men esirtki oramasy tárkilendi. Saraptamaǵa sáıkes, alynǵan esirtki zattarynyń jalpy salmaǵy 5 kg-dan asatyn marıhýana bolyp shyqty.

Atalǵan jaıt QR QK-niń 296-baby «Esirtki psıhotroptyq zattarmen, sol tektestermen prekýrsorlarmen ótkizý maqsatynsyz zańsyz jumys isteý» jáne 297-baby «Esirtki psıhotroptyq zattardy sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý tasymaldaý, jóneltý ne ótkizý» boıynsha SDTBT-ǵa tirkeldi. Kúdikti qamaýǵa alyndy. Sotqa deıingi tergeý amaldary júrgiziledi.

Sondaı-aq, jedel-aldyn alý is-sharalaryn júrgizý barysynda Túrkistan oblysy PD EQQKB jedel ýákilderi Kentaý qalasynyń turǵynyn esirtki saqtaýda kúdikti retinde ustady. Ustalǵan kúdiktiniń úıin tintý kezinde tártip saqshylary marıhýanaǵa uqsas ósimdik tektes esirtki zaty bar eki polıetılen paketti taýyp, tárkiledi. Saraptama qorytyndysy boıynsha, tárkilengen esirtki zaty 1 kg-dan asatyn marıhýana bolyp shyqty.

Qazirgi ýaqytta atalǵan jaıt boıynsha QR QK-niń 296-baby «Esirtki psıhotroptyq zattarmen, sol tektestermen prekýrsorlarmen ótkizý maqsatynsyz zańsyz jumys isteý» boıynsha sotqa deıingi tergeý amaldary júrgizilýde. Kúdikti qamaýǵa alyndy. Polısıa qyzmetkerleri kúdiktiniń esirtkini qandaı maqsatpen saqtaǵanyn, sondaı-aq basqa da qylmystardyń tolyq mán-jaıyn anyqtaýda.