Jambyl oblysynda ıslam dini salasy mamandarynyń biliktiligin jetildirý, dinı bilimin arttyrý jumystary jandanyp keledi. Bul maqsatta «hıbatýla Tarazı» ortalyq meshitiniń janyna saýat ashý kýrstary, dinı bilim jáne kadr daıyndaý bólimderi, ımamdardyń bilimin jetildirý ınstıtýttary jumys jasaýda, dep jazady Qamshy.kz aqparat agenttigi. 

Óńirde ásirese destrýktıvti dinı aǵymdarǵa qarsı ımýnıtet qalyptastyrýǵa basa mán berilýde. Sáıkesinshe quziretine dál osy aǵymnyń aldyn alý kiretin din ókilderin oqytý, biliktiligin arttyrý jumystary jolǵa qoıylǵan.

–Oblys ákimdigi din problemalaryn zertteý ortalyǵynyń memlekettik áleýmettik tapsyrysy aıasynda destrýktıvti dinı ıdeologıaǵa qarsy ımýnıtet qalyptastyrý maqsatynda oblys ımamdarynyń biliktiligin arttyrý semınary uıymdastyryldy. «Hıbatýlla Tarazı» meshitinde ótken bul eki aptalyq oqý semınaryna 129 din qyzmetkeri qatysty. Sondaı-aq, destrýktıvti aǵymnyń aldyn alý maqsatynda meshit jamaǵatynyń bilim deńgeıin kóterý baǵytynda 24 talapker qatysqan 1 aılyq saýat ashý kýrstary ashylyp otyr. Sondaı-aq din qyzmetkeriniń jan-jaqty bilimdi bolýy zaman talaby ekenin eskere otyryp, ortalyq meshit janynan dinı bilim jáne kadr daıyndaý bóliminiń jumysy jolǵa qoıyldy. Jyl basynan beri ımamdardyń bilimin jetildirý ınstıtýtynyń 2 aılyq kýrsynan bizdiń oblystan 6 ımamy bilimin jetildirdi. Óńirdegi meshitterde ımam qyzmetine nıet bildirgen 2 azamat saýatyn ashty, –deıdi Qazaqstan musylmandar dinı basqarmasynyń oblys boıynsha ókili, «Hıbatýla Tarazı» meshitiniń bas ımamy Qanat Jumaǵul.

Jalpy óńirdiń Qyrǵyzstanmen shekaralas aýmaqtarynda destrýktıvti dinı aǵym ókilderiniń kóbeıýi, jat aǵymdardy ýaǵyzdardy nasıhattaıtyn dinı ádebıetterdiń erkin aınalymy syndy áreketter beleń alýda. Soǵan qaramastan ıslam dininiń ókilderi bul aǵymdarǵa saýatty tosqaýyl berý, olarǵa ótken azmattardy qoǵamǵa qaıta beıimdeý máselesin jiti nazarda ustaıdy. Ári bul jumystardy júıeli júrgizetin din ókilderiniń bilimin jetildirý de ózektiligimen kún tártibinen túsken emes. Bul jumystarda Qazaqstan musylmandar dinı basqarmasy, oblys ákimdiginiń din ister basqarmasy, din problemalaryn zertteý ortalyǵy, «Hıbatýla Tarazı» oblystyq ortalyq meshittiń ımamdary birlese kúsh biriktirip áreket etýde.