Jambyl oblysynyń 2019-2020 jyldardaǵy jylý berý maýsymyna 99,8 paıyzǵa daıyn dep jazady Qamshy.kz aqparat agenttigi.

Bul jyl basynan beri júrgizilgen tyńǵylyqty ázirlik sharalarynyń nátıjesi.

Qazirgi tańda oblys kóleminde 437 avtonomdyq qazandyq bolsa, aldaǵy mańyzdy maýsymǵa onyń barlyǵy saqadaı saı tur. Sondaı-aq, 340 shaqyrym jylýmen jabdyqtaý jelileriniń 338,5 shaqyrymy, 969,2 shaqyrym sýmen jabdyqtaý jelisi de tolyq daıyn. Onyń 21 shaqyrymy bıyl jóndeýden ótken.

Atalǵan jeliler arqyly 1670 búdjettik nysanǵa jylý beriledi. Bul nysandar da jylytý maýsymyna tolyqtaı ázir. Sol sekildi 786 bilim, 390 densaýlyq saqtaý jáne 494 mádenıet nysany jylý qabyldaýǵa tas-túıin daıyn otyr. Odan bólek, 1579 kópqabatty úıge jylý beriledi.

Qys mezgilinde qatty otyn – kómir tóńireginde birqatar másele týyndaıtyny bar. Ótken jyldaǵydaı qarbalasty bolmhdyrmaý maqsatynda aımaqta aldyn alý sharalary júrgizilgen. Jalpy, oblystaǵy búdjettik mekemeler jylytý maýsymyna qajetti kómirdiń kólemi 66,4 myń tonnany quraıdy. Búgingi tańda qajetti otyn tolyqtaı jetkizilgen. Bul jumysty Taraz qalasy jáne oblys aýmaǵynda 30 jeke kompanıa júzege asyrǵan.

Al jambyldyqtardyń jeke turǵyn úılerine qajetti kómir kólemi 254,6 myń tonnany qurasa, atalǵan kólemniń 147,7 myń tonnasy nemese 58 paıyzy jetkizilgen. Jaýapty mamandar kómir baǵasy sharyqtamaıtynyn aıtady. Búginde oblys aýmaǵynda kómirdiń tonnasyn temirjoldyń tuıyǵynan araqashyqtyǵyna, kenish orny men fraksıasyna baılanysty 11myń men 14 myń teńge aralyǵynda satýda.

Monoqalalardaǵy ortalyq qazandyqtardy otynmen qamtý da júıeli júzege asyrylǵan. Mamandar olardy otynmen tolyqtaı qamtýǵa 1,1 mlrd. teńge qajet ekenin aıtady. Qazirgi ýaqytta 2019 jylǵa oblystyq búdjetten 496,8 mln.teńge bólingen. Bul qarajattyń 105,7 mln. teńgesi Qarataý qalasyna 4,5 mln. tekshe metr gaz alýǵa , 389 mln. teńgesi Jańatas qalasyna 5062 tonna mazýt alýǵa qaralǵan.

– Sondaı-aq, Qarataý qalasynyń qazandyǵyna jylytý maýsymyna qajetti 11,4 mln. tekshe metr gazǵa 273,6 mln.teńge qajet. Bul maqsatta 2019 jyldyń 4-shi toqsanyna 4,5 mln. tekshe metr gazǵa 105,7 mln. teńge oblystyq búdjetten bólingen. Jańatas qalasyna 10646 tonna mazýtqa 1 041,3 mln. teńge qajet. 2019 jyldyń 4-shi toqsanyna 5062 tonna mazýtqa 535,1 mln. teńge qajet. Búginge 305,1 mln. teńge oblystyq búdjetten bólindi. QR Energetıka mınıstirliginiń hatyna sáıkes mazýtty tasmaldaý baǵasymen 105,7 myń teńge bolyp belgilengen. Osyǵan oraı, aldaǵy

oblystyq búdjettin naqtylaýyna 145,9 mln. teńgege búdjettik ótinim berildi.

2020 jyldyń 1-shi toqsanyna 5584 tonna mazýtqa 590,2 mln. teńge qajet. Al, Shý qalasynyń qazandyǵyna ótken jylytý maýsymynan qalǵan 183,2 mln. teńgege 7,4 mln. tekshe metr gaz satyp alýǵa jetkilikti. Sonymen qatar ótken jylytý maýsymynan qalǵan rezervtegi 744,3 tonna kómirleri bar, – deıdi Jambyl oblysy ákimdigi energetıka jáne turǵyn úı-kommýnaldyq sharýashylyq basqarmasynyń basshysy Q. Qorǵanbaev.