Jambyl oblysy Shý aýdanyndaǵy Shoqpar aýyly eń jaqyn mańdaǵy órt sóndirý bóliminen 85 shaqyrym jerde ornalasqan. Osy sebepti eldi mekende órt sóndirý beketin qurý qajettiligi bary jaıynda aıtylyp kele jatqanyna birshama ýaqyt bolǵan-dy dep jazady Qamshy.kz aqparat agenttigi.

Nátıjesinde, máseleni sheshýdiń ár túrli nusqalary aýyldyq jáne aýdandyq ákimshilikter deńgeıinde qarastyrylyp, beket qurý isin kezeń-kezeńmen júzege asyrý týraly sheshim qabyldandy.

Osylaısha, beketti ustaý úshin aýdan búdjetinen 2 mln. 188 myń teńge bólindi. Atalǵan beket jeti shtattyq qyzmetkerlermen jasaqtalǵan, onyń ishinde 4 júrgizýshi jáne 3 órt sóndirýshi bar. Olardy órt-tehnıkalyq qural-jabdyqtarmen jabdyqtaý úshin 800 myń teńge bólindi. Órt sóndirý beketi «QTJ UK» AQ fılıaly PCH SHÝ -50 mekemesiniń ǵımaratynda ornalasqan. Onda demalý bólmesi, telefon baılanysymen qamtamasyz etilgen dıspecherlik bólme jáne órt sóndirý avtomobıline arnalǵan jyly boks bar.

Jýyrda, bekettiń qurylý jáne jasaqtalý jumystary máresine jetken soń, órt sóndirý beketiniń ashylý saltanaty ótti. Jańa órt sóndirý beketiniń ashylý is-sharalaryna Shý aýdany ákiminiń orynbasary Nurlan Jaqsybaev, Shoqpar aýyldyq okrýgi ákimi Rashıd Shombaev, Jambyl oblysy TJ departamentiniń Shý aýdany TJ bólimi men ÓSB qyzmetkerleri, sondaı-aq Shoqpar aýylynyń turǵyndary qatysty.

Jańadan qurylǵan órt sóndirý beketiniń komandasy órt oshaqtaryna shyǵyp qana qoımaı, olardyń jaýapkershilik aımaǵynda bolyp jatqan basqa da tótenshe jaǵdaılardy joıýǵa qatysady. Qıyn jaǵdaıǵa tap bolǵan adamdarǵa kómek kórsetedi, sondaı-aq aldyn alý jumystarymen aınalysady.

Órt sóndirý beketiniń jaýapkershilik aımaǵynda 20 shaqyrym radıýsta 3 myńnan astam turǵyny bar 3 eldi meken ornalasqan. Sondaı-aq Shoqpar temir jol stansıasy jáne temir jol kóliginiń basqa da obektileri bar.

Oblystyq TJD Shý aýdany tótenshe jaǵdaılar bólimi men órt sóndirý bólimi qyzmetkerleri beketiniń ashylý saltanaty aıaqtalǵannan keıin órt sóndirý beketiniń jeke quramymen shartty órtti sóndirý boıynsha teorıalyq jáne praktıkalyq sabaqtar ótkizdi, jattyǵýlar barysynda olardyń órt kezindegi is-áreketteri, órt kezinde órt avtokóliginen sý berý jáne sý kózderinen sý alý amaldary pysyqtaldy.

Órt beketiniń birinshi kúninen bastap beket jasaqtary turǵyn úıde oryn alǵan órtti sóndirýge shyqty, onda 100 túk shóp janýy oryn alǵan. Jańadan jasaqtalǵan órt beketiniń qyzmetkerleri tapsyrmany órtke barý ýaqytyn qosa alǵanda 25 mınýt aralyǵynda oıdaǵydaı aıaqtady.