Ýaqytynda eńbek aqylary tólenbeýine baılanysty qurylysshylar jumystaryn toqtatqan. Al qurylys jumysy aıaǵyna deıin jetpegen. Jyl aıaǵyna deıin 21 kóshedegi jóndeý jumystary aıaqtalýy kerek edi. Ázirge josparlanǵan jumys tek jartylaı ǵana bitken. Jumysshylar "eńbekaqyny almaǵansha ornymyzdan qozǵalmaımyz" deıdi. Olardyń basym bóligi qalaǵa ońtústik óńirden kelgen. Barlyǵy – úıiniń jalǵyz asyraýshysy.

«Jumysqa tamyzdyń 15-de kelgenmin. Sodan áli aılyq alǵan joqpyz. Tamaq, jatatyn jer osy jerden. Biraq áli qolymyzǵa aılyq túsken joq», - dedi merdiger kompanıanyń jumysshysy Qaırat Aınaqulov.

“Bizge ár aıdyń ony kúni jalaqyny beremiz degen.  Aıtqan ýaqyttarynan asyp ketti. Qyzylorda oblysy, Qazaly aýdanynan jumys isteýge kelgenbiz»,- dedi merdiger kompanıa jumysshysy İzet Muratov.

Al, merdiger kompanıanyń basshylyǵy jumys ornynda bolmaı shyqty. Jumysshylardyń kelsin degen ótinishin de elemegen. Jınalǵan jurttyń suraqtaryna kompanıanyń jalǵyz ókili, qurylys tobynyń brıgadıri jaýap qatty. Alaıda onyń sózinshe, jalaqy tek 10 kún berilmeı qalǵan. Mundaı jaǵdaı birinshi ret bolyp otyrǵan kórinedi.  "Biz tek bir aıdyń jalaqysyn berýimiz kerek. Aýmaq basshysy jumysshylarǵa avans berý úshin keńsege ketti", - deıdi "Dáýlet-dorstroı" JSHS qurylys brıgadasynyń basshysy Aıbar Áýbákirov.

Qurylysshylardyń sózinshe, jalaqynyń berilmeýine qarjylaı qıyndyqtar sebep bolǵan. Tapsyrys berýshi qalalyq mobıldilik basqarmasy qarjyny tolyq aýdarmaǵan kórinedi. Sol sebepti eńbekaqy keshiktirilip tur eken. Al basqarma belgilengen qarajat merdiger kompanıaǵa ýaqytyly aýdarylǵanyn alǵa tartqan.