Qazaq ádebıetiniń kórnekti ókilderi Ábish Kekilbaev pen Farıza Ońǵarsynovanyń 80 jyldyǵy men «Rýhanı jańǵyrý» baǵdarlamasy aıasynda «Mańǵystaý» telearnasyndaǵy «Sóz ben saz» baǵdarlamasynyń 27-konserti ótedi. Mańǵystaý aýdanynda ótetin merekelik keshke Qazaqstannyń ár aımaǵynan jınalǵan sazgerlerdiń uly tulǵalarymyzǵa arnap shyǵarǵan ánderi shyrqalatyn bolady.

-«Osy ýaqytqa deıin Ábish Kekilbaıuly men Farıza Ońǵarsynovaǵa arnap, arǵy tarıhy otyz jyldan asa, bergisi jas býyn sazgerler án arnaǵan eken. Barlyǵyn jınaqtap bir konsertke syıǵyzyp otyrmyz. Bul jerde Ábish Kekilbaıulynyń shyǵarmalarymen Farıza Ońǵarsynovanyń óleńderine jazylǵan ánder aıtylmaıdy. Olarǵa arnalǵan ánder aıtylady. Negizgi avtorlary QR-nyń 8 oblysynan keledi dep josparlap otyrmyz» - dedi «Sóz ben saz» baǵdarlamasynyń avtory ári júrgizýshisi Berdihan Álmen.

80 jyldyqqa arnalǵan mereı toıda Jambyl oblysynan «Farıza jan» ániniń avtory, QR mádenıet salasynyń úzdigi Ábıirbek Tináli, Almaty qalasynan qazaq estradasynyń jaryq juldyzy Roza Álqoja, Qyzylorda oblysynan kompozıtor Jaqsygúl Begmanova, Aqtóbe oblysyna Marǵulan Qulmaǵanbetov jáne mańǵystaýlyq aqyn-sazgerler qatysady dep kútilýde.

Aıta keteıik, qazirgi ýaqytta Mańǵystaý, Atyraý, Aqtóbe oblysynda  Ábish Kekilbaıuly men Farıza Ońǵarsynova esimi berilgen 6 mektep bar. Shyǵarmashylyq keshtiń ereksheligi – atalǵan úsh oblystan eń úzdik degen oqýshylary kelip, ádebıet alyptarynyń óleńderin naqyshyna keltirip oqıtyn bolady.