Ushaqta jolserik qazaq tilinde qyzmet kórsetpegeni úshin "Air Astana" kompanıasyn sotqa berip, jeńip shyqqan Oǵyz Doǵan  atty ulty túrik azamatqa qatysty taǵy da keleńsiz jaǵdaı oryn aldy.

Áıeli, balasy úsheýi elordadan Shymkentke ushpaq bolyp, áýejaıǵa kelgende olardy "Fly Arystan" kompanıasynyń qyzmetkerleri ushaqqa mingizýden bas tartqan. Sebep "Air Astana" kompanıasy Oǵyz Doǵandy "qara tizimge" engizipti. Al "Fly Arystan" "Air Astana"-nyń enshiles kompanıasy bolǵandyqtan tártip olarǵa da ortaq eken. Bul jóninde Oǵyz Doǵan óziniń  feısbýktegi paraqshasynda habarlady.

Oǵyz Doǵannyń aıtýynsha, kompanıanyń bul áreketi sotta jeńilgenderi úshin ese qaıtarý, kektený.

Oǵyz Doǵannyń feısbýk paraqshasyndaǵy vıdeodan ózin Suńǵat dep tanystyrǵan "Fly Arystan" kompanıasynyń ókili máseleniń anyqtalý ústinde ekenin aıtyp, jolaýshyǵa kúte túrýyn ótinip jatqanyn kórýge bolady.

Biraq qalaı bolǵanda da Oǵyz Doǵan, otbasymen atalmysh reısten qalyp qoıdy. Nur-Sultan – Shymkent baǵytyndaǵy ushaq 14.55-te Shymkent qalasyna ushyp ketti.