7 qazanda Almaty oblysy Aqsý aýdanynda Qytaı men Qazaqstan jumysshylary arasynda janjal boldy. Bul týraly Almaty oblystyq polısıa departamenti habarlady.

Departament baspasóz qyzmetiniń habarlaýynsha, janjal aldymen Qytaıdyń tórt jumysshysy arasynda bastalyp, keıin tóbeleske ulasqan. Barlyǵy – "Citic Construction" kompanıasynyń jumysshysy. Tóbelesten Qazaqstanda turaqty turýǵa ruqsaty bar Qytaı azamaty, etnıkalyq qazaq jaraqattanǵan.

Departamenttiń málimetinshe, "kelesi kúni jergilikti turǵyndar men "Citic Construction" kompanıasynda jumys isteıtin Qazaqstan azamattary "istiń baıybyna barmaı Qytaıdan kelgen jumysshylardy uryp-soqqan".

Tóbelesten Qytaıdyń tórt azamaty jaralanyp, aýrýhanaǵa túskeni habarlandy. Polısıa "Buzaqylyq" baby boıynsha tergeý bastalǵanyn, kúdiktiler ustalǵanyn aıtty.

– Bul fakti boıynsha QR qylmystyq kodeksiniń 293-baby 3-bóligi (Buzaqylyq) , 107-baptyń 2-bóligi (densaýlyqqa qasaqana aýyrlyǵy ortasha zıan keltirý)  jáne 106-baby 2-bóligi (densaýlyqqa qasaqana aýyr zıan keltirý) boıynsha sotqa deıingi tergeý júrip jatyr. Kúdiktiler anyqtalyp, ustaldy, – dedi Almaty oblysy polısıasynyń baspasóz qyzmeti.

Budan bólek, tekseris kezinde "Citic Construction" kompanıasynda sheteldiń 33 jumysshysy zańsyz jumys istep júrgeni anyqtalǵan. Polısıa qazir olardy Qazaqstannan deportasıalaýmen aınalysyp jatqanyn málimdedi.

Áleýmettik jelide 8 qazannan beri osy máselege baılanysty vıdeo tarala bastaǵan. "Citic Construction" JSHS-niń jumysshylary BAQ ókilderine vıdeo úndeý jarıalady. Vıdeo úndeýde jumysshylar sheteldik men jergilikti turǵyndarǵa teń eńbek jaǵdaıy jasalmaǵanyn alǵa tartqan.