Qazaqstan boks federasıasynyń prezıdenti bolyp kásipker Keńes Raqyshev saılandy. Mundaı sheshim búgin, 9 qazanda ótken federasıanyń jyldyq konferensıasynda qabyldanǵan. Konferensıaǵa qatysqan federasıa ókilderniń barlyǵy Raqyshevtyń kandıdatýrasyn qoldap daýys bergen.

2009 jyldan beri boks federasıasyn Qazaqstandy 30 jylǵa jýyq úzdisiz bılegen Nursultan Nazarbaevtyń kúıeý balasy, kásipker Tımýr Qulybaev basqardy. Qazaqstan boks federasıasy resmı saıtynyń jazýynsha, Qulybaev "múddeler qaqtyǵysyn boldyrmaý úshin" óz qyzmetinen ketý týraly sheshim qabyldaǵan. Sondaı-aq, Qulybaev Sý sporty túrleri  federasıasynyń prezıdenti qyzmetinen de ketken. 

Qulybaevtyń orynyna kelgen Raqyshev  1979 jyly Almatyda týǵan. Ol  - Qazaqstannyń saýda-ónerkásip palatasyn basqarǵan belgili memleket jáne qoǵam qaıratkeri Hamıt Raqyshevtyń uly, Qazaqstannyń joǵary bıliginde laýazymdy qyzmetter atqarǵan Imanǵalı Tasmaǵanbetovtyń kúıeý balasy. Raqyshev birneshe jyl Forbes jýrnalynyń reıtıńi boıynsha eldegi eń baı kásipkerlerdiń qatarynda boldy. Ol 2018 jyldyń jeltoqsanynda boks federasıasynyń vıse-prezıdenti bolyp taǵaıyndalǵan.