Parlament senaty memlekettik shekara mańynda ornalasqan aýyl sharýashylyǵy maqsatyndaǵy jerlerdi sheteldikterge berýge tyıym salatyn zańdy qabyldady dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Búgin senatta "Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly" zań jobasy ekinshi oqylymda qaraldy. Zań jobasy 13 kodeks pen 29 zańǵa ózgerister men tolyqtyrýlar engizýdi kózdeıdi.

"Zań jobasynda memlekettik shekara mańynda ornalasqan aýyl sharýashylyǵy maqsatyndaǵy jerlerdi sheteldikterge, azamattyǵy joq adamdarǵa, sheteldik zańdy tulǵalarǵa, sondaı-aq sheteldikterdiń qatysýy bar qazaqstandyq zańdy tulǵalarǵa berýge tyıym salý kózdelgen", - delingen senattyń agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń qorytyndysynda.

Budan bólek, zań jobasynyń negizgi túzetýleri jer resýrstary salasyndaǵy mynadaı normalardy kózdeıdi: erekshe qorǵalatyn tabıǵı aýmaqtardyń jerlerin bosalqy jerlerge aýystyrý jaǵdaılaryn shekteý; aýyl sharýashylyǵy maqsatyndaǵy jerlerdiń utymdy paıdalanylýyna baqylaý jasaý tetigin jetildirý; aýyz sý sapasyndaǵy jerasty sýlaryn paıdalanýǵa ruqsat berý talaptaryn naqtylaý.

Sondaı-aq, janýarlar men ósimdikter álemi salasyndaǵy brakonerlik máseleleri boıynsha ákimshilik jáne qylmystyq zańnamalardyń normalary qatańdatyldy.

Zań jobasynda kózdelip otyrǵan ózgerister zańnamalyq bazany jetildire otyryp, eńbek ónimdiligin eseleýge, sondaı-aq óńdelgen ónim eksportyn ulǵaıtý arqyly agroónerkásip kesheni salasynyń básekege qabilettiligin arttyrýǵa qolaıly múmkindikter qalyptastyrmaq.

Senat depýtattary zań jobasyn ekinshi oqylymda maquldap, qabyldady.