«Rýhanı jańǵyrý» baǵdarlamasy aıasynda jyl basynan beri Jambyl oblysynda kóptegen jańa jobalar júzege asyrylyp keledi. Osy jobalardyń taǵlymy mol, bereri kóp ekendigi turǵyndardyń bergen oı-pikirlerinen ańǵarylady. Bıylǵy jyl «Jastar jyly» bolyp jarıalanýnya oraı óńirdegi jastardy qoldaý, yntalandyrý, shyǵarmashylyqtaryn nasıhattaý maqsatynda birshama sharalar atqarylýda. Sonyń biri oblystyq «Taraz sımfonıasy» óner festıvali. Óńirden shyqqan aqyndar men kompozıtorlardyń shyǵarmashylyǵyn nasıhattaýmen qatar klasıka, jaz, romans janrlaryn belsendi túrde damytýǵa arnalǵan shara shyǵarmashyl ónerpazdardyń qarym-qabiletin arttyryp, talantty jastardy anyqtaý maqsatynda shalǵaıda jatqan aýyldardan bastaldy.

-Oblystyq «Taraz sımfonıasy» óner festıvaliniń aýyldyq irikteý, ıaǵnı I-kezeńi 2019 jyldyń 2-12 sáýir aralyǵynda oblys aýdandarynyń aýyldyq okrýgterinde júrgizilgen bolatyn. Atalmysh kezeń boıynsha qatysýshylar «Aspapta oryndaý» jáne «Vokal» nomınasıalarymen ózara baq synady. Festıváldiń aýdandyq irikteý kezeńderi 2019 jyldyń 15 sáýir kúni oblys aýdandarynda ótkizildi.

Al festıvaldiń II-kezeńine 200-ge jýyq ónerpazdar qatysyp, III-kezeńge 150 úmitker ótti.

Budan keıin «Taraz sımfonıasy» óner festıvaliniń III-shi aýdandyq irikteý kezeńi 2019 jyldyń 16-24 sáýir aralyǵynda ótti. Aýdandyq irikteý kezeńine oblys aýdandary men Taraz qalasynan barlyǵy 150 úmitker qatysyp, Oblystyq halyq shyǵarmashylyǵy ortalyǵynyń bilikti mamandarynan quralǵan saraptaý komısıasy jasaqtaldy,-deıdi Jambyl oblysy ákimdigi mádenıet, arhıvter jáne qujattama basqarmasynyń basshysy D.Byqybaev.

Aıtýly básekede QR «Mádenıet salasynyń úzdigi», «Qurmet» ordeniniń ıegeri, Oblystyq halyq shyǵarmashylyǵy ortalyǵynyń dırektory Ǵanı Sadyrbaev, QR «Mádenıet salasynyń úzdigi», kórkemdik jetekshi Elmıra Dýtbaeva, ánshi, kompozıtor 2011 jyly ótken Respýblıkalyq Sh.Qaldaıaqov atyndaǵy konkýrsynyń laýreaty Kópshil Ertaev, I Respýblıkalyq «Úrmeli jáne estradalyq aspapta oryndaýshylar» konkýrsynyń laýreaty Nurbol Baımbetov úmitkerlerdiń ónerin baǵalap, 85 ónerpazǵa oblystyq irikteýge sertıfıkat tabystady.

Oblystyq irikteýge QR mádenıet qaıratkeri, qazaq estradasynyń maestrosy Nurlan Baıkózov pen «H-band» estrada jáne jaz orkestriniń jetekshisi Serik Ótegenov qatysty. Nátıjesinde «Vokal» nomınasıasynan – 31, «Aspapta oryndaý» – 8 qatysýshy úzdik dep tanyldy.

Al kúni keshe «Balasaǵun» ortalyq konsert zalynda «Taraz sımfonıasy» óner festıvaliniń gala-konserti joǵary deńgeıde ótti.