Ábish Kekilbaevtyń 80 jyldyq mereıtoıy qarsańynda Aqtaýda Respýblıkalyq Ardagerler keńesiniń kóshpeli otyrysy ótti. Ortalyq kenestiń tóraǵasy Baqtyqoja İzmuhambetov bastaǵan el ardagerleri abyz jazýshynyń shyǵarmalaryn jastarǵa keńinen nasıhattaý týraly sóz qozǵady.

Keńeske Mańǵystaý oblysynyń ákimi Serikbaı Trumov qatysyp, elimizdiń túkpir-túkpirinen jınalǵan ardagerlerdi mereıli sharamen quttyqtady. «Úlken ómirlik tájirıbesi men danalyǵy mol aǵa urpaqtyń jastardy rýhanı jaǵynan tárbıeleýde, baǵyt-baǵdar berýde mańyzy zor. Jasy ulǵaıǵanyna qaramastan aǵa býyn ókilderi, qurmetti ardagerlerimiz oblystyń áleýmettik-qoǵamdyq ómirine etene aralasyp keledi. Olardyń qajymas qaıraty, azamattyq ustanymy – jas urpaqqa úlgi-ónege»,-dedi Serikbaı Ótelgenuly.

Óńirlerden kelgen aqsaqaldar alqasy men ardagerler keńesiniń tóraǵalary Qazaqstan Respýblıkasynyń Prezıdenti Q.Toqaevtyń Qazaqstan halqyna Joldaýyn  talqylady. Aqsaqaldar keńesi  jastarǵa  rýhanı tárbıe berý, áleýmettik máseleler, keńestiń buqara halyqpen baılanysy syndy máselelerge toqtalyp,  sóz sońynda aımaqtardy bir-birinen tájirıbe almasýǵa shaqyrdy.

Semınar barysynda  urpaqqa qaldyrǵan baǵa jetpes muralary saralanyp, nasıhattalýy sóz boldy.Ábish Kekilbaevtyń qaıtalanbas qoltańbasy qazaq ádebıetiniń ǵana emes, álem ádebıetiniń qazynasyna aıtylyp, kósemsóz sheberiniń shyǵarmashylyǵy boıynsha tereń nasıhattar júrgizý -  keleshek býyn  men el aǵalary aldyndaǵy mańyzdy mindet ekeni aıtyldy.

-«Óz basyńnan baq aýsa da, el basynan baq aýmasyn» degen sóz Ábish Kekilbaevtyń azamattyq ustanymynyń aıqyn aıǵaǵy. Marjansóz sheberi, ultjandy saıasatker Ábish Kekilbaevtyń shyǵarmashylyǵyn, onyń jalpy murasyn ósip kele jatqan urpaqtardyń arasynda keńinen dáripteý – bul bizdiń birinshi kezektegi maqsatymyz bolýy tıis» - dep qorytty jınalǵandar.

           Aıta keteıik, semınar-keńeske Ardagerler uıymy Ortalyq Keńesiniń tóralqa músheleri men barlyq oblystyq jáne Nur-Sultan, Almaty, Shymkent qalalyq ardagerler keńesteriniń basshylary, shaqyrylǵan zıaly qaýym ókilderi, Mańǵystaý oblysynyń aktıvi, buqaralyq aqparat quraldary ókilderi qatysty.  

Keńes músheleri úsh kún ishinde Mańǵystaý aýdandyq ardagerler uıymynyń jumys tájirıbesimen tanysady. «Otpantaý» tarıhı-mádenı kesheni men óńirdegi kıeli jerlerge zıarat jasaıdy.