Jambyl oblysynda «Jastardyń altyn besigi» taqyrybynda jastardyń «Qazaqstannyń 100 jańa esimi» jobasynyń kandıdattary jáne jeńimpazdarymen kezdesýi ótti. Baızaq aýdany Sarykemer aýyldyq okrýginde ótken shara Qazaqstan halqy assambleıasynyń «Qoǵamdyq kelisim» mekemesiniń tapsyrysy boıynsha uıymdastyryldy.

Jastar jyly aıasynda ótken jıynǵa Jambyl oblystyq máslıhatynyń úshinshi, tórtinshi jáne besinshi shaqyrylymdarynyń depýtaty, Qoǵamdyq keńestiń tóraǵasy Sembek Seıdazımov, Jambyl oblysy ákimdiginiń densaýlyq saqtaý basqarmasy Jambyl oblystyq «Qan ortalyǵynyń» dırektory, Qazaqstan halqy Assambleıasynyń múshesi Gýlam Ýmarov, Jambyl aýdany Asa aýylyndaǵy «Aınalaıyn» balalar men jasóspirimder ortalyǵynyń «Jastar klýby» qoǵamdyq birlestiginiń tóraıymy Aıgúl Razaqova qatysyp, jastarmen jetistikke jetýdiń joly jaıly oılarymen bólisip, bilim básekesinde ozyq bolýǵa shaqyrdy.

Janyna rahat syılamaǵan meıramhanadan bas tartyp, balalarǵa arnalǵan tegin mektep ashqan Aıgúl Razaqova:

– «100 jańa esim» jobasynyń tizimine kiremin dep oılamadym. Men tek ózime baqyt syılaıtyn jumyspen aınalystym. Jáne sol eńbegim osyndaı jeńiske jetkizdi. Jas kezimizde 90-jyldary joldasym ekeýmiz 3 bólmeli ýıimizden balalarǵa arnalǵan tegin mektep ashtyq. Mekteptiń shyǵynyn ózim kýnine 4-5 shulyq, 1 jempir toqyp ótedim. Solaı mektepte birneshe úıirmeler ashtyq. Qazirgi ýaqytta ortalyǵymyzdaǵy 9-synyp oqýshysy bı ónerinen «Qazaqstan rekordtar» kitabyna endi. Meniń aıtqym kelgeni Senderdiń árqaısylaryń osy «100 esimniń» qatarynda bolýǵa laıyqtysyńdar. Tek jas kezderińdi bos istermen áýrelemeı, qazirgi kezdiń ózinde úlken jetistikke jete alatyndaryńdy túsinseńder deımin, – dep aǵynan jaryldy.

Óskeleń urpaqtyń sanasynda áleýmettik jaýapkershilikti, patrıotızmdi nyǵaıtýǵa baǵyttalǵan kezdesýden jastardyń alǵan áseri erekshe. № 3 Baızaq kolejiniń stýdenti Nurqasym Myńjasar: «Búgingi kezdesýden kolejimizdiń jastary erekshe áser aldy. Jıynǵa qatysyp, taǵylymdy dúnıeler aıtyp jastardy jigerlendirgen qoǵam qaıratkerlerine erekshe alǵys aıtamyz. Aldaǵy ýaqytta osyndaı kezdesýler jıi uıymdastyrylsa biz tek qýanamyz!» – dep kezdesýden alǵan tálimimen bólisti.

Shara nátıjesinde jastar bilim-ǵylym salasynda jetistikke jetip, óz isteriniń sheberi atanǵan keıipkerlermen ashyq áńgimelese otyryp «Qazaqstannyń 100 jańa esimi» jobasy jeńimpazdarynyń naqty jetistikterimen tanysyp, bolashaqqa baǵdar aldy.