Baızaq aýdanynda ardagerler keńesiniń V plenýmy bolyp ótti. Ony aýdandyq ardagerler keńesiniń tóraǵasy Kemelbek Bespaev ashyp, esepti kezeńde atqarylǵan jumystarǵa baılanysty baıandama jasady.
Qazirgi tańda, aýdanda 9000 zeınetker turady. Olar 18 aýyldyq okrýgterdegi ardagerler keńesterine, 65 bastaýysh uıymdaryna biriktirilgen. Baıandamashy el múddesi jolynda ardagerler qaýymynyń tyndyrǵan tirlikterin alǵa tarta kele, Elbasynyń «Ult jospary», «Uly dalanyń jeti qyry» atty maqalalary men Memleket basshysy Qasym-Jomart Toqaevtyń Qazaqstan halqyna arnaǵan Joldaýyndaǵy basym baǵyttaryn túsindirý boıynsha qolǵa alynǵan tirlikterge toqtaldy. Oblys ákimi Asqar Myrzahmetovtiń halyqtyń ál-aýqatyn kóterý baǵytyndaǵy qanatqaqty jobasynyń mańyzyn túsindirý, jastardy otansúıgishtikke tárbıeleý, bastaýysh uıymdardyń jumysyn jaqsartý, aýdannyń 80 jyldyq mereıtoıyn atap ótýdegi ardagerlerdiń ıgilikti tirlikteri, oblystyq, aýdandyq deńgeıdegi ótkizilgen sporttyq jarystarda top jarǵan baızaqtyq qarıalardyń jeńisteri, kómekke zárý qarıalarǵa kórsetiletin qaıyrymdylyq sharalary men aldaǵy ýaqytta qolǵa alynǵaly otyrǵan mańyzdy isterdi jergilikti jaǵdaımen baılanystyra baıandady. Munymen qatar, baıandamashy ardagerler arasynda shaǵyn bıznesti dóńgeletip otyrǵan Nesipkúl Baıjanova, Ryskeldi Sarshaev jáne Bekjasar Ermahanbetovtiń, ardagerler keńesindegi jastar isimen aınalysatyn turaqty komısıasynyń tóraǵasy Serik Kembaevtyń, nusqamalyq-ádistemelik komısıasynyń tóraǵasy Sháımerden Myrzalıevtiń esimderin atap ótip, áleýmettik máseleler jónindegi komısıasy tóraǵasy Serik Balabekovtiń tikeleı uıytqy bolýymen ashylǵan áleýmettik bólmeniń jurtqa tıgizip otyrǵan paıdasyn nazardan tys qaldyrmady. Ardagerler keńesi aldynda turǵan mindetterdi jumyla otyryp, iske asyrylatyndyǵyn jetkizdi.
Baıandama boıynsha jaryssózge shyqqan ardagerler keńesiniń músheleri ózderi turatyn aýldardaǵy birqatar máselelerdi kóterip, solardy nazarǵa alý jaıynda ótinishterin aıtty.
Plenýmda sóz alǵan aýdan ákimi Nurjan Nurjigitov aýyldyq okrýgterdi aralap, jergilikti turǵyndardyń tynys-tirshiligimen tanysý barysynda aǵyn sý, kógildir otyn, taza aýyz sýmen qamtý jáne joldardy jóndeý, turǵyndardyń ál-aýqatyn kóterý syndy mindetter baǵytyndaǵy jumystarǵa toqtaldy.
Pleným sońynda kún tártibine shyǵarylǵan máseleler boıynsha qaýly qabyldandy.
