Jambyl oblysynda sybaılas jemqorlyq faktilerin boldyrmaý jáne aldyn alý baǵytynda keshendi jumystar júrgizilýde. Bul baǵytta aımaqta Sybaılas jemqorlyqqa qarsy is-qımyl Agenttiginiń Jambyl oblysy boıynsha departamenti qyzmet etýde. Departament basshysy Á.Áshirbaevtiń aıtýy boıynsha, Agenttiktiń sybaılas jemqorlyqqa qarsy is-qımyl baǵytyndaǵy jumysty sanynan sapaǵa aýystyrý týraly tapsyrmasyn júzege maqsatynda qylmystardy anyqtaý jumysy belsendirilip, oń nátıjelerge qol jetkizilgen.

Atap aıtqanda, aǵymdaǵy jyldyń 9 aıynda júıeli sybaılas jemqorlyq deregi boıynsha – 6, kishi jáne orta bıznes sýbektileriniń jumysyna aralasý deregi boıynsha - 14, laýazymdy tulǵalar tarapynan kóleńkeli bıznes sýbektilerine qamqolyq jasaý deregi boıynsha – 7 jáne memlekettik baǵdarlamalar aıasynda bólingen qarajattardy urlaý deregi boıynsha - 14qylmys tirkelgen.

Memlekettik organdar arasynda sybaılas jemqorlyq sıpatynda jasalynǵan qylmystardyń sany boıynsha, áli kúnge deıin jergilikti atqarýshy organdar kósh bastap keledi. Bul óte ókinishti statısıka. Óıtkeni, halyqpen tikeleı baılanys jasaıtyn organ bolǵandyqtan, bul salada jemqorlyq faktilerimen kezdesýdiń yqtımaldyǵy óte joǵary deńgeıde áli kúnge deıin saqtalyp keledi. Naqty aıtar bolsaq, jergilikti atqarýshy organdardyń laýazymdy tulǵalaryna qatysty 53qylmystyq is tirkelgen. Bul kórsetkish ótken jyldyń osy kezeńimen salystyrǵanda nebary 34-ti quraǵan edi.

Jemqorlyq áreketterine jol berilgen salalarda kósh basyn bilim berý salasy bastap tur. Atalǵan salada jyl basynan beri 18 jemqorlyq faktisi tirkelgen. Sonan soń, aýyl sharýashylyǵy – 8, mádenıet jáne sport – 6, densaýlyq saqtaý – 5, qurylys – 5, jer qatynastary – 4, turǵyn-úı komýnaldyq sharýashylyǵy – 3 jáne áleýmettik qamsyzdandyrý – 1 oqıǵa oryn alyp, tizimge iligip otyr.

Bul rette, ishki ister organdarynyń qyzmetkerleriniń de «belsendiligi» basym bolyp otyr. Atalǵan salada 17 oqıǵa tirkelgen. Sondaı-aq, arnaıy memlekettik organdardyń qyzmetkerleri – 6, áskerı shendiler – 4, qarjy mınıstrliginiń qurylymdyq bólimsheleriniń qyzmetkerleri – 4, ekonomıkalyq tergeý qyzmetiniń qyzmetkerleri – 2 jaǵdaıǵa jol bergen.

Osyndaı oń dınamıka sotqa deıingi is júrgizý baǵytynda da baıqalýda. Atap aıtqanda, aǵymdaǵy jyldyń 9 aıynda Departamentpen 93 qylmystyq is sotqa joldanǵan. Al qylmys jasaǵany úshin qylmystyq jaýapkershilikke tartylǵan tulǵalardyń sany 89-dy qurap otyr.