"Qamshy" – erkin aqparat alańy. Oı ortaqtasyp, pikir jarystyrý oqyrmannyń enshisinde. Esterińizde bolsa jaqynda «Qamshy» portalynda tanymal qazaqstandyq tenısshi Zarına Dıas týraly aýqymdy maqala jaryq kórgen bolatyn. Maqalada, Qazaqstannyń birinshi raketkasy - Zarınanyń memlekettik tilde sóılemeıtindigi synǵa alynǵan edi. «Qamshy» portaly reseılik «Sovetskıı sport» basylymyna silteme jasaı otyryp, tenısshi Zarına Dıastyń Qazaqstan tenıs federasıasy týraly málimdemesine de toqtalǵan bolatyn. Bul maqala qazaqstandyq BAQ pen áleýmettik jelide qyzý pikir-talas týdyryp, másele ýshyǵyp ketken edi. Reseılik buqaralyq aqparat quralynyń maqalasyn qazaqstandyq «sport.nur.kz» saıty jarıalaǵan bolatyn.
Reseılik basylym jarıalaǵan alǵashqy maqalaǵa qatysty tanymal tenısshiniń ózi ún qatypty. Bul týraly «Qamshy» saıty Vesti.kz-ke silteme jasaı otyryp habarlaıdy.
Qazaqstandyq áleýmettik ortada qyzý talqy týdyrǵan daýly suhbatqa qatysty tenısshi Zarına Dıas jańa málimdemesinde jasaǵan. Onda, Zarına reseılik basylymǵa suhbat bermegenin aıtqan eken. Sondaı-aq, «Sovetskıı sporttaǵy» materıaldar jalǵan ekenin, óziniń Qazaqstan tenıs federasıasyn syamaǵanyn jáne memlekettik tilge degen qurmetsiz sózder aıtpaǵanyn aıtypty.
-Men «Sovetskıı sport» basylymyna suhbat bergen joqpyn. Ondaǵy aqparattar oıdan quralǵan jáne meniń atymnan jazylǵan,-deıdi Zarına Dıas.
Eskerte keteıik, qazaqstandyq tenısshi qyzdyń suhbaty «Sovetskıı sport» basylymyna 6-shilde kúni jarıalanǵan bolatyn.
Al Zarına Dıas – Qazaqstannyń birinshi raketkasy jáne WTA reıtıńisi boıynsha 34-orynǵa taban tiregen.
Al maqalada aty atalǵan taǵy bir qazaqstandyq estrada juldyzy – Dilnaz Ahmedıeva «Feısbýk» áleýmettik jelisi arqyly bolǵan oqıǵaǵa qatysty jaýabyn beripti. Dilnaz hanymnyń ózi áleýmettik jelini paıdalanbaıtyndyqtan, jaýabyn qurbysy, tanymal prodúser – Alýa Qonarova jetkizdi.
- Qurmetti dostar! Atalmysh suhbat osydan 10 jyl buryn bir jýrnalǵa jarıalanǵan bolatyn. Al qazir ol jýrnal jabylyp qalǵan. Men bul jýrnaldyń redaksıasyn izdestirgen bolatynmyn, tappadym. Sebebi, olar meniń atymnan jalǵan aqparat taratqan eken. Iaǵnı, olardyń áýelgi maqsattary osy bolǵan. Osy elde ómir súre turyp, ósip-ónip, osy eldiń nanyn jeı tura, QR Eńbek sińirgen qaıratkeri ataǵyn ala turyp, «bul ultty jek kóremin» deýim, tipti uıat bolar edi. Men Qazaqstanda, qazaqtardyń arasynda turamyn jáne men qazaq ultyna degen óshpendiligim joq. Bul aqymaqtyq bolar edi jáne ondaı suuraqty maǵan eshkim qoıǵan joq. Qoısa da, meniń jaýabym múlde basqasha bolar edi. Men Qazaqstandy jaqsy kóremin! Meniń eń jaqyn qurbylarym, dostarym – qazaqtar! Sondyqtan, meniń atymnan taralǵan jalǵan aqparatqa senbeýlerińizdi ótinemin. Barlyǵyńyzǵa tynyshtyq pen jaqsylyq tileımin! Qurmetpen, sizderdiń Dilnaz!
Nurgeldi Ábdiǵanıuly
