Temirjol salasynyń el ekonomıkasynyń ózegi, memlekettiń qýatty kúshi ekenine daý joq. Búginde 20 mıllıonǵa tarta jolaýshy tasymaldyń osy túrin tańdaıtynyn nazarǵa alsaq, irge qalaǵanyna júz jyldan asqan shoıyn joldyń qazirgi ahýaly jyl sanap qarqyndy órkendeý ústinde. Al búgingi mejege jetý jolynda Tuńǵysh Prezıdent – Elbasy Nursultan Nazarbaevtyń qoldaýy zor bolǵanyn bilemiz. Sonymen qatar elimizdegi bilikti, tájirıbeli kásibı temirjolshylardyń mańdaı teri sińdi, aıanbaı eńbek etti. Nátıjesinde Qazaqstan temirjol salasy sońǵy jyldary óndiristik jáne tehnıkalyq áleýeti jaǵynan aıtarlyqtaı ilgeriledi.

Aıtalyq, bir ǵana Jambyl júk tasymaly bólimshesi jyl basynan beri júk artyp, túsirýdiń mejesin 6 043 000 tonnalyq 91 025 vagon dep josparlasa, bul 6 129 891 tonnalyq 91 579 vagonǵa deıin jetken. Osylaısha jospar 106,68 paıyzǵa artyǵymen oryndalypty. Iaǵnı, bul sandardan júk tasymalynyń 80 891 tonnaǵa nemese 554 vagonǵa artqanyn ańǵaramyz. Al muny byltyrǵy kórsetkishpen salystyra qaraıtyn bolsaq, 453 975 tonnalyq 6 565 vagonǵa nemese 108,00 paıyzǵa ulǵaıǵan.

Atalǵan sıfrlar jaıynda Jambyl júk tasymaly bólimshesi dırektorynyń logıstıka jumystary jónindegi orynbasary Ádil Túsipov áńgimelep berdi.

Temirjol desek, kóz aldymyzǵa eki ıyǵynan dem alyp, júzdegen júk tıelgen vagondar men sısternalardy súıregen eńbekker qumyrsqalar tárizdi lokomotıvter, jolaýshylary jaıly vagondaryn ýaqytsha uıa etken teplovozdar jáne solardyń úzdiksiz qyzmeti úshin qysta aıazdy, jazǵy aptapta rels boıynda júretin adamdar – temirjolshylar keledi.

Ádil Túsipovtiń aıtýynsha, temirjolshy mamandyǵy – erlik pen úlken jaýapkershilikti talap etetin kásip. Máselen, sala qyzmetkerleri bıyldyń ózinde taskómir tasymalyn 113 paıyzǵa artyǵymen oryndap tastasa, munaıdy – 109 paıyzǵa, hımıkattardy – 112 paıyzǵa, óndiristik shıkizatty – 111 paıyzǵa, granshlakty – 132 paıyzǵa, qant, jemis-jıdekterdi – 133 paıyzǵa, tuzdy – 322 paıyzǵa, sementti – 105 paıyzǵa, konteınerlik júkter – 117 paıyzǵa jáne qaldyq júkterdi 194 paıyzǵa artyǵymen tasyǵan.

Bul sandardy da byltyrǵy kórsetkishtermen salystyra qaraıtyn bolsaq, jumystyń edáýir ulǵaıǵanyna kóz jetkize túsemiz. «Ótken jyly munaıdyń tasymaly 215 paıyzdy qurasa, tústi metaldyń tasymaly – 120 paıyzdy, hımıalyq tyńaıtqyshtar – 112 paıyzdy, hımıkattar – 101 paıyzdy, óndiristik tyńaıtqyshtar – 111 paıyzdy, granshlag – 185 paıyzdy, kókónister – 114 paıyzdy, tuz – 288 paıyzdy, bıdaı – 362 paıyzdy, konteınerlik júkter – 120 jáne qaldyq júkter 105 paıyzdy qurady», - deıdi bólimshe dırektorynyń orynbasary.