Jýyrda «Qazaqstan temir joly – Júk tasymaly» AQ Jambyl bólimshesiniń dırektory Berik Aqshalovtyń tóraǵalyǵymen úlken jıyn ótip, onda eki aptaǵa jýyq ýaqyt bólimsheniń qurylymdyq mekemelerinde júrgizilgen kúzgi komısıalyq baıqaýdyń qorytyndysy shyǵaryldy. Jıynda bólimshege qarasty birqatar qurylymdardyń basshylary baıandama jasady.

Jambyl júk tasymaldaý bólimshesinde de qysqy kezeńge daıyndyq jumystary qyza túsken. Fılıaldyń qysqy kezeńge daıyndyǵyn komısıalyq tekserý jumystary aıasynda ınfraqurylymnyń, qozǵalmaly quramnyń jáne óndiristik-tehnıkalyq nysandar men qyzmettik ótkelderdiń, perrondardyń jaǵdaıy men jumysshylardyń arnaıy kıimdermen qamtylýy qaralǵan. Oǵan qosa, tehnıkalyq jabdyqtardyń jáne olardyń bólshekterindegi aqaýlardy anyqtaý, qozǵalys jáne eńbek qaýipsizdiginiń jaǵdaıyn pysyqtaý jumystary da júrgizilip, anyqtalǵan aqaýlar monıntorıngin júrgizý, jumysshylardyń kásibı biliktiliginiń daıyndyǵy deńgeıin saralaý, jumysshylardyń tehnıkalyq oqýlaryn júrgizý jáne uıymdastyrý syndy sharalarmen bólimsheniń qysqa daıyndyǵy bir pysyqtaldy.

Fılıal boıynsha alǵashqy «qystaýshy» qyzmetkerler tolyq oqytýdan ótipti. Qyzmetkerlerdiń barlyǵy arnaıy kıimdermen, aıaq kıimdermen jáne jeke qorǵanys quraldarymen tolyq qamtamasyz etilgen. Sondaı-aq, aldyn alý jumystaryna arnalǵan túrli kerek-jaraqtardyń qajetti qory jasaqtalyp, stansıalardaǵy mehanıkalyq jáne elektrondy tarazylardyń jaı-kúıi tekserilip, qorytyndysy alynypty.

Jalpy, baıandamalardan belgili bolǵany – kúzgi komısıalyq baıqaýdyń nátıjesi Jambyl júk tasymaly bólimshesiniń jáne onyń barlyq salalyq qurylymdarynyń qysqa daıyndyǵy turaqty ekenin kórsetti. Bul rette OP-115, Borandy, Shyǵanaq jáne Úshbulaq stansıalarynyń kórsetkishterin erekshe atap ótken jón.

Jalpy, jıyn sońynda aıtylǵan barlyq máseleler boıynsha qaýly shyǵarylyp, kemshilikterdiń bári aldaǵy ýaqytta nazardan tys qalmas úshin basshylarǵa jeke-jeke tapsyrmalar júkteldi. Máselen, Jambyl júk tasymaly bólimshesiniń bas ınjeneri A.Kımge jumysshylardyń tehnıkalyq bilimin qadaǵalap, ony jetildirý isi qatań júktelse, Jambyl magıstraldy jelileri bólimshesiniń dırektory A.Kýkýzovke eskertpelerdiń merziminde oryndalýy men qurylymdyq basshylardyń poıyzdar qozǵalysy qaýipsizdigi men eńbektiń qorǵalýyn qadaǵalaý boıynsha atqarar jumystaryn júıeleý tapsyryldy.

Al hattamalyq sheshimniń jalpy oryndalýyn baqylaýdy bólimshe dırektory B.Aqshalov óz mindetine aldy.

Jalpy, josparly tekserý barysynda qozǵalys qaýipsizdigin basqarý júıesiniń qyzmetine jáne onyń uıymdastyrylý deńgeıine, tehnıkalyq quraldardy ustap turý baǵytyndaǵy qolǵa alynǵan sharalardyń tıimdiligine baǵa berilip, ketken kemshilikterdi joıyp, apatsyz jaǵdaıda jumys isteýdi qamtamasyz etýdiń jospar-syzbasy jasaldy. Bir sózben aıtqanda fılıaldyń barlyq qurylymdyq bólimsheleri qysqy kezeńge daıyn.