Taraz qalasynda osymen ekinshi jyl qatarynan «ASPARA FASHION WEEK» sán aptalyǵy uıymdastyrylýda. Bul sharaǵa Qazaqstannyń sán áleminiń sańlaqtary men birge sán ındýstrıasynyń belgili tulǵalarynyń jumystary kópshilik nazaryna usynyldy, dep jazady Qamshy.kz aqparat agenttigi. 

Taraz qalasynan shyqqan belgili sánger «Asyl-Dızaın» sán úıi men «Aspara» modeldik óner jáne bıznes kolejiniń negizin qalaýshy Aıdarhan Qalıev uıymdastyrǵan bul sharada Eýropa men Azıa elderinen shyqqan 20-ǵa jýyq dızaınerdiń týyndylary usynyldy. Sán aptalyǵy sánger Aıdarhan Qalıevtiń «Aspara» brendiniń qalyptasqanyna 20 jyldyǵy qarsańynda ótkizilip otyr. Bul jolǵy sán aptalyǵyna eýropalyq mamandardyń joǵary daıyndyqpen kelgeni kórinip turdy. Ári olar qazaqtyń ulttyq mádenıetimen bite qaınasqan qazaqstandyq sángerlerdiń jumysyna qyzyǵýshylyq tanytyp, olardy óz elderinde ótetin sharalardyń belsendi qonaǵy bolýǵa shaqyryp ta jatty. Sharany tamashalaýshylar da otandyq sán ındýstrıasy ókilderiniń tyń týyndylarynyń kóńilderinen shyqqanyn tilge tıek etti.

Al ótken jyly tuńǵysh ret álemdik sán ındýstrıasyna aty belgili sángerlerdiń basyn qosqan bul sharaǵa 19 memlekettiń bilikti dızaınerleri qatysqan bolatyn. Olardyń arasynda Italıa men Úndistann, Golandıa men Qytaı, Fransıa syndy bul saladaǵy ózindik qoltańbasy bar memleketterdiń ókilderi bolýy sharanyń qanshalyqty salmaqty ekenin aıǵaqtaı túsken. Oblys ákimdiginiń týrızm basqarmasy sol sharanyń aıasynda óńirge 3 myńǵa taıaý týrıs kelgenin málimdedi. Shara qatysýshylarynyń arasynda «Germanıa sán aptalyǵynyń» prezıdenti Katarzına Stevanov, «Serbıa sán aptalyǵynyń» prezıdenti Svetlana Horvat, amerıkandyq «FNL Network» telearnasynyń dırektory Rokko Leo Jaglıotı, «Mılan sán aptalyǵynyń» prezıdenti Marıanna Mıshelı, «Bolgarıa arýy» baıqaýynyń jeńimpazy Veronıka Stevanova syndy tulǵalardyń bolýy bul sharaǵa sánge qyzyǵýshy kópshiliktiń nazaryn aýdartty.

Aıta ketý kerek jergilikti sazger Aıdarhan Qalıevtyń álemge tanymal týyndylarynyń kóbinde «Ań stıliniń» úlgisi baıqalady. Bul Tuńǵysh Prezıdent-Elbasy Nursultan Nazarbaevtyń «Uly Dalanyń jeti qyry» maqalasynda aıtylǵandaı bul stıldiń búginde óner týyndylarynda kóptep qoldanylyp júrgendigin aıqyndaıdy.