Memleket basshysy Qasym-Jomart Toqaevtyń Qazaqstan halqyna Joldaýynda meılinshe shıkizattyń negizgi túrlerinen bas tartyp, ekonomıkany ártaraptandyrý jaıy aıtylǵany belgili. Bul oraıda Jambyl oblysynda birqatar áleýetti jobalary qolǵa alynǵan. Ári bul jobalar óńirlerdiń ekonomıkalyq áleýetin arttyryp, jergilikti turǵyndardyń jumyspen qamtyp keledi. Bolashaqta osynaý biregeı joba Sarysý aýdanynda júzege asyrylmaq, dep jazady Qamshy.kz aqparat agenttigi. 

Atalǵan joba aıasynda buǵan deıin eksportqa táýeldi bolyp kelgen kálsılendirilgen soda Sarysý aýdanyndaǵy Toǵyzkent aýylynda salynatyn zaýytta óndirile bastaıdy. Zaýytty túrkıalyq «Iyldyrym Holdıń» kompanıasynyń elimizdegi ókildigi sanalatyn «QAZAQ SODA LLP» kásiporny júrgizedi. Jaqynda Jambyl oblysy ákimi Asqar Myrzahmetov pen kásiporyn jetekshisi Ismaıl Jeılandy qabyldap, zaýyt qurylysyn júrgizý, onyń óndiristik áleýeti jaıynda oı qozǵady Kompanıa qazir zaýyt qurylysyn júrgizý úshin 18 shaqyrymdyq elektr jelisin qajetsinedi. Investısıalyq saıasatqa saı ınvestorlarǵa ınfraqurylym tartýǵa búdjetten qarjy qarastyrylady. Sondyqtan da oblys ákimi «QAZAQ SODA LLP» kásiporny jetekshisine elektr energıasy jelisin tartý, temir jol qurylysyna júrgizý jumystaryna tıisti qujattar tolyqtyrylǵan jaǵdaıda ǵana qazyna qarjysy bólinetinin jetkizdi. Al kompanıa ázirge bul jumystardy óz esebinen júrgizbek. Ákimdik ınvestorǵa ınfraqurylymǵa jumsaǵan shyǵyndy kelesi jyly búdjetti ekinshi ret naqtylaý kezinde qaıtarylatynyn jetkizdi. Jalpy jobalyq quny 220 mıllıon AQSH dollary bolatyn óndiris orny 2 jyldan soń tolyq qýattylyǵymen iske qosylmaq. Qazir kompanıa ókilderi zaýyt qurylysy júretin aımaqtaǵy shıkizat qoryna barlaý jasady. Aldyn-ala boljam boıynsha zaýyt óndiristik qýatynyń alǵashqy kezeńinde 400 myń tonna ónim óndiredi. Zaýyttyń iske qosylýymen munda 300 jańa jumys orny ashyldy. Kompanıa basshylyǵy ujymnyń 95 paıyzyn jergilikti turǵyndardan alýǵa nıetti. Sondyqtan qajetti kadrlardy daıarlaý máselesine qatysty taraptar da ózara kelisimge keldi.

Aıta ketý kerek bul sheshim ótken jyly Elbasy Nursultan Nazarbaevtyń Túrkıaǵa resmı sapary kezinde naqtylanǵan bolatyn. Sol kezde eki el arasyndaǵy kásipkerlikti damytý maqsatynda 1 mıllıard 700 mıllıon AQSH dollarynan asatyn 22 ekijaqty kommersııalyq qujatqa qol qoıylǵan edi.