1-maýsym Halyqaralyq balalardy qorǵaý kúnine oraı ánshi-sazger Roza Álqoja alǵash ret Astana jurtshylyǵyn án besiginde terbetýdi josparaýda. Tek jańa ánderi ǵana shyrqalatyn keshten bir kún buryn «Qazaq tolqyny» stýdıasynan daıyndalyp shyqqan Rozanyń óz oryndaýyndaǵy jańa ánderiniń, avtorlyq ánderiniń, oblys ortalyqtarynda, Almaty qalasynda ótken án keshteriniń jáne óleńderiniń taspasynyń tusaýy kesilmek. Tusaýkeser keshiniń qonaqtary: ánshi-sazger Roza Álqoja, aıtysker aqyn Aınur Tursynbaeva, aqyn Baqytgúl Babash, jýrnalıs Aıdyn Qaba, vızajıst-stılıst Erjan Aıtqalı jáne taǵy basqalar. Maqsaty — óner súıer jurtshylyqtyń aldynda búginge deıin atqarǵan jumystaryna esep berý, shyǵarmashylyǵyndaǵy jańalyqtarymen bólisý. 

  Mýzyka men aqyndyq sóz bir-birimen jymdasa otyryp, júrekke jyly, unamdy birlik jasaıtyny sekildi, Rozanyń oryndaǵan árbir áni tyńdaýshy júreginen oryn alyp, ǵashyqtardyń sezim pernesin shertti. Onyń oryndaýyndaǵy «Men syıǵa tartqan oramal», «İzdemeısiń», «Aqberen», «Ol kóktem oralmaıdy», «Myna ómir ǵajap qandaı», «Júrek nazy» ánderi árbir kórermen qosyla shyrqaıtyn ánge aınaldy. Asanáli Áshimov: «Meniń janrym – kúndelik» dese, Roza: «Meniń janrym – sms», - deıdi. «Ǵumyrymdaǵy sáıkesim» dep ataǵan, ónerde orny bólek apasy Aqmaral Leýbaevamen jyl boıy jazylǵan sms hattary óleń bop órildi. Ózgege bildirmeı, ózim dep bir-birine syr aıtqan qos óner ıesiniń bul tásili kópke unady. Osy arqyly Rozaǵa ádebıet ókilderi aqyn dep  baǵa bere bastady.

    Jastaıynan janyna óleńdi serik etip ósken Roza alǵashqy shyǵarmashylyq keshin týǵan ólkesi – Maqtaral óńirinde ótkizip, eldiń batasyn aldy. Sodan beri elimizdiń túkpir-túkpirine án sapar jasap, jany da, áni de jaryq nurlarǵa toly, názik júrek pen ásem daýystyń ıesi kóptiń kóńilinen shyǵyp keledi. Búginge deıin ánshi-sazger retinde kópshilikke tanys Roza Álqojanyń taǵy bir qyry ashylmaq. Aqyndar ózara uqsastyǵymen emes, ózgesheligimen de qyzyq. Rozanyń jyrlaryna kóz júgirtip kórseńiz, shynaıy ómirdi ańǵarasyz. Onyń tirshiligin, muńyn, kúıin, qýanyshyn óleńnen tabasyz.

Baılanys telefony: 8 702 907 44 72