Túrkistan oblysynyń ákimi Ómirzaq Shókeev 16 jastaǵy jigitti úsh jyl boıy zorlap, aqsha bopsalaǵan polısıanyń burynǵy qyzmetkerine qatysty qylmystyq is tergelip jatqanyn aıtty, – dep Qamshy.kz aqparat agenttigi habarlaıdy.

Óńir basshynyń aıtýynsha, qazirgi tańda qylmystyq isti óńirdegi tártip saqshylary tergep jatyr.

"Bul isti bilemin. Prokýratýra, óńirlik polısıa departamenti áli kúnge deıin jumys júrgizip jatyr. Tanymal blogerler iske aralasqysy keledi. Degenmen, bul qylmys. Ony saıasılandyryp, eldi dúrliktirmeý kerek", – dedi Ó.Shókeev ortalyq komýnıkasıalar qyzmetinde ótken baspasóz máslıhatynda.

Sondaı-aq atalmysh is zań aıasynda sheshiletinin, ony árbir baspasóz máslıhatynda kótere berý durys emes ekenin atap ótti.

"Quzyrly organdar rettesin. Sot úkim shyǵarady. Eger úkim ádil bolmasa, isti qaıta qarasyn. Meniń oıymsha, ár baspasóz máslıhatynda bul máseleni qaıta-qaıta kóterýdiń qajeti joq", –dep túıindedi sózin Túrkistan oblysynyń ákimi.

Eske salsaq, 2019 jyldyń jazynda Túrkistan oblysynyń Abaı aýylynda 16 jastaǵy jigitti úsh jyl boıy zorlap, aqsha bopsalaǵan polısıanyń burynǵy qyzmetkeri ustaldy. Bul aqparatty tanymal qazaqstandyq advokat Aıman Omarova áleýmettik jelide jarıalaǵan edi. Jigitti zorlaǵan burynǵy tártip saqshysy 15 jylǵa deıin bas bostandyǵynan aıyrylýy múmkin. Búgingi kúnge deıin tergeý amaldary júrip jatyr.