23 qazan kúni Almaty qalalyq Qorǵanys isteri departamentiniń jınaý pýnktinde «El tiregi – 2019» respýblıkalyq aksıasy aıasynda 45 sarbazdy Otan aldyndaǵy boryshyn óteýge saltanatty túrde shyǵaryp salý sharasy ótti. Qazaqstannyń Qarýly kúshteriniń sapyna qosylǵaly otyrǵan sarbazdar abyroıly da jaýapty mindetin Óskemen qalasyndaǵy áskerı bólimde atqarmaq.

Áskerge shaqyrylýshylar qalanyń 8 aýdanynan jınalǵan. Olardyń árqaısysy moraldyq-iskerlik qasıetke, kemi arnaıy orta bilimge ıe.

Saltanatty sharaǵa Aýǵan soǵysynyń ardagerleri, Áýezov aýdanynyń Qorǵanys isteri basqarmasynyń bastyǵy Denıs Nasyrov, Áýezov aýdany ákimshiliginiń ókilderi jáne áskerge attanyp bara jatqan sarbazdardyń ata-ana, týǵan-týystary qatysty.

Shyǵaryp salý rásimin Áýezov aýdanynyń Qorǵanys isteri basqarmasynyń bastyǵy Denıs Nasyrov ashyp, jas jaýyngerlerge sáttilik, qyzmetterine aq jol tiledi.

– Otandy qorǵaý, aıbyndy armıamyzdyń sapynda Otan aldyndaǵy boryshty óteý – ár er azamat úshin abyroıly is. Elin, jerin qorǵaýǵa árkez ázir jaýyngerlerdi daıyndaý memlekettik saıasattyń basym baǵyttarynyń biri ári biregeıi. Qurmetti sarbazdar! Áskerı qyzmet Sizderdi batyr, ójet, aýyzbirligi mol, bolashaqtan zor úmit kúttiretin naǵyz er azamat, Otanymyzdyń qorǵany, halqynyń qaharmany etip shyǵaratynyna senimdimiz. Sizderge zor densaýlyq, qajyr-qaırat, sarqylmas entýzıazm jáne asqaq maqsattarǵa jeteleıtin erik-jiger tileımin! Otanǵa adal da abyroıly qyzmet etip, maqtanarlyqtaı istermen kózge túsińder! Óz-ózderińe eshqanan kúmándanbańdar!, – dedi basqarma bastyǵy.

Osyndaı birneshe júrekjardy quttyqtaý-lebizderden keıin mektep oqýshylary áskerge shaqyrylǵandarǵa Áýezov aýdany ákimshiligi taǵaıyndaǵan alǵashqy qajetti zattardan jasalǵan syılyqtardy tapsyrdy.

Artynsha, sarbazdarǵa ata-ana, jaqyn-jurattarymen qoshtasýyna ruqsat etildi. Shara sońynda konserttik nomerler qoıyldy.

Osy kúzde Almaty qalasy boıynsha 1992-2001 jyldary týǵan 1500 jasty ásker qataryna alý josparlanǵan. Olar QR Qarýly Kúshteri, Memlekettik kúzet qyzmeti, Ulttyq gvardıa, UQK Shekara qyzmetinde qyzmet etedi.