QR Prezıdenti Ákimshiliginiń qoǵamdyq qabyldaýyna júginýge bolatyn YouTube-kanal ashyldy. Arnany elimizge belgili zańger Abzal Quspan tanystyrdy. Alǵashqy vıdeoda joba ıdeıasy qaıdan shyqty, onyń qyzmeti nendeı bolady, azamattar qalaı júginedi degen suraqtarǵa jaýap berilgen.

– Bıylǵy tamyz aıynda QR Prezıdenti janynan Aıda Balaevanyń jetekshilik etýimen QR Joǵarǵy sotynyń, Bas prokýratýranyń, İshki ister mınıstrliginiń, basqa da vedomstvolardyń qatysýymen azamattardy qabyldaý qoǵamdyq komısıasy qurylǵan bolatyn. Bul qoǵamdyq komısıaǵa azamattar respýblıkanyń túkpir-túkpirinen óz aryz-shaǵymyn aıtyp keledi. Naqty jeke qabyldaý barysynda olardyń problemalary atalǵan tulǵalar men oblys ákimderi, óńir basshylarynyń selektorlyq keńesi arqyly sheshilip otyrady, – dedi zańger komısıanyń YouTube arnasynda.

Abzal Quspan zańdyq-quqyqtyq túıitkilder naqty osy jerde, osy sátte sheshilýi tıis ózekti másele bolǵandyqtan qoǵamdyq komısıaǵa kirý týraly prezıdent ákimshiliginen túsken usynysty qabyl alǵan.

– Komısıa quramyna Prezıdent Ákimshiliginiń arnaıy shaqyrýymen QR Advokattar qaýymdastyǵy atynan qatysyp otyrmyn. Jıyn barysynda ár azamattyń máselesi jeke taldanyp, talqylanyp, problemalardyń meıilinshe oń sheshilýine jaǵdaı bar. Ár azamattyń jaǵdaıy ártúrli bolǵanymen máseleleri ortaq. Ony sheshý joldary ortaq. Ózimniń zańgerlik kómegimdi berip otyrý kerek dep sheshtim. Aıda Ǵalymqyzynyń basshylyǵymen bolatyn osy komısıa eshkimdi alalamaı, bólip-jarmaı, ár azamattyń muń-zaryn tyńdap, máselelerdi sheshedi, – dedi ol.

Mazalaǵan saýaly, zańdyq-quqyqtyq baǵyttaǵy mazalaǵan suraǵyn ár azamat YouTube-arnada shyqan vıdeo astyna pikir qaldyrý arqyly jetkize alady. Sondaı-aq muń-muqtajdyqty zańgerdiń WhatsApp nómirine – 8747 515 79 42 joldaýǵa bolady.