Almatyda úsh qabatty jekemenshik úıde gaz jarylyp, 3 adam aýyr jaraqat aldy, – dep Qamshy.kz aqparat agenttigi habarlaıdy.

"QazTransGaz Aımaq" AQ baspasóz qyzmetiniń málimdeýinshe, Pervomaıka aýylyndaǵy Postyshev, 64 "V" mekenjaıynda barak tıptes 3 qabatty jekemenshik úıde jarylys boldy. Onda jaldamaly bólmelerde 12 otbasy turyp jatqan.

Oqıǵa ornyna jetken apattyq-dıspecherlik qyzmettiń habarlaýynsha, jarylys birinshi qabattaǵy №3 páterde oryn alǵan. Sondaı-aq qatty dúmpý úıdegi esik-terezeni, ishki qabyrǵalardy qıratqan.

"36 jastaǵy er adamnyń denesin 100 paıyz kúıik (3-dárejeli) shalǵan. Ol jasandy tynys alý apparatyna qosylǵan. Naýqastyń jaǵdaıy óte aýyr. 19 jastaǵy qyzdyń denesiniń 85 paıyzyn kúıik (3-dárejeli) shalǵan. Jaǵdaıy óte aýyr. 23 jastaǵy jigittiń beti, aıaq-qoldary kúıgen (1-dárejeli). Denesiniń 22 paıyzy zaqymdanǵan. Bul pasıenttiń de jaǵdaıy óte aýyr", –  deıdi basqarmanyń baspasóz qyzmeti.

Mamandardyń aıtýynsha, úıdegi gaz qazandyǵy qıramaǵan. 

Al qalalyq Qoǵamdyq densaýlyq saqtaý basqarmasynyń aqparatyna súıensek, jedel járdem brıgadasy №4 aýrýhanaǵa 3 pasıentti jetkizdi. Úsheýi da qazir jansaqtaý bóliminde jatyr.