QR Premer-Mınıstri Asqar Mamınniń tóraǵalyǵymen ótken Úkimet otyrysynda elimizdiń 2019 jylǵy qańtar-qazan aılaryndaǵy áleýmettik-ekonomıkalyq damýynyń jáne respýblıkalyq búdjettiń oryndalýynyń qorytyndylary qaraldy. 

Qazaqstan ekonomıkasy turaqty ósý betalysyn kórsetip otyr – 2019 jylǵy qazan-qańtar aılarynda JİÓ ósimi ótken jyldyń sáıkes kezeńine 4,4% qurady. Qurylysta – 12,7%, saýdada – 7,5%, kólik salasynda – 5,6%, óńdeý sektorynda, onyń ishinde mashına jasaýda – 18,2%, jeńil ónerkásipte – 19%, tústi metaldar óndirisinde – 7,5%, munaı óńdeýde – 7,2%, metal kenderin óndirýde – 16,1%, baılanys qyzmetinde – 4,5% oń dınamıka baıqalyp otyr. Ulttyq qor aktıvteri 2,1%-ǵa $59,2 mlrd-qa deıin, respýblıkalyq búdjetke kirister – 8386,6 mlrd teńgege (jospardyń 100%) artty, ósý qarqyny 113,7% qurady. 

Úkimet basshysy Aqtóbe, Aqmola, Shyǵys Qazaqstan, Pavlodar jáne Soltústik Qazaqstan oblystarynyń ákimdikteriniń jumysynyń jaqsy nátıjesin atap ótti, olarda osy jyldyń 10 aıynyń qorytyndysy boıynsha negizgi ekonomıkalyq ındıkatorlardyń ósimi baıqalady. Artta qalýshy ákimdikterge problemalyq kórsetkishter boıynsha jaǵdaıdy retke keltirý úshin túbegeıli sharalardy qabyldaýdyń qajettigi aıtyldy.

– Búdjet bóligi boıynsha ótken jylmen salystyrǵanda, osy jyldyń josparynyń asyra oryndalýy baıqalýda. Degenmen, búdjettik baǵdarlamalardyń birqatar ákimshisinde búdjet qarajattarynyń ıgerilmeýi belgilengen. Ótkizilmegen konkýrstar, josyqsyz merdigerler jáne qarjylandyrý josparlary boıynsha ózgerister jónindegi dálelder qabyldanbaıdy. Jyl sońyna deıin bir jarym aı qaldy, – dedi A. Mamın.

Premer-Mınıstr ekonomıkanyń sapaly ári turaqty ósimin qamtamasyz etý úshin ınvestısıalar tartýǵa, jumys oryndaryn qurýǵa, ónimdilikti arttyrýǵa jáne azamattardyń ál-aýqatyn jaqsartýǵa barlyq kúsh-jigerdi jumsaý qajet ekenin atap ótti.