Belsendi Dýlat Aǵadildiń Aqmola oblysy Selınograd aýdanyndaǵy ýaqytsha ustaý ızolátorynan qashyp ketkeni habarlandy. Bul týraly 13 qarasha kúni keshke Facebook áleýmettik jelisinde belsendiler jazdy. Resmı organdar bul jaıtqa qatysty áli resmı aqparat bermedi. 

Nurjan Seıtjanov esimdi nursultandyq belsendi 13 qarashada Facebook-ta tikeleı efırge shyǵyp, polısıanyń Aǵadildi izdep, úıinde "tintý júrgizgenin" habarlady. 

Aǵadildiń áıeli Gúlnar Qasymhanova 13 qarasha kúni keshki saǵat 22.00-de  úıine ózderin polısıa ókilderimiz dep tanystyrǵan adamdar kelip, kúıeýiniń ýaqytsha ustaý ızolátorynan qashyp ketkenin aıtqan. Qasymhanovanyń aıtýynsha, kúıeýiniń bosap shyǵýyna bir kún qalǵan, sondyqtan onyń qashyp shyǵýy múmkin emes.

Aǵadildiń ýaqytsha ustaý ızolátorynan "qashyp shyqqanynyna" belsendiler de kúdikpen qaraıdy. Bul týraly olar Facebook-ta jazyp jatyr. Jaqynda bılikke qarsy opozısıalyq partıa quratynyn málimdegen belsendi, jýrnalıs Janbolat Mamaı "Aǵadil túrmeden qashty" degenge senbeıtin, bul belsendini "saıası sebeppen qýdalaý" dep biletin jazdy. 

"Dýlat Aǵadil túrmeden qashty degenge men senbeımin. Birinshiden, merzimi aıaqtalýǵa bir kún qalǵanda qashyp nesi bar? Ekinshiden, talaı túrmede otyrǵan adam retinde aıtaıyn: odan qashý múmkin emes! Úshinshiden, Dýlat ózin kináli sezinbeıdi. Sezikti sekiredi demekshi, onyń qashatyn jóni de joq! Sondyqtan, muny saıası sebeppen qýdalaý dep bilemin! Qorǵaýǵa daıynbyz!" dedi Mamaı. 

Dýlat Aǵadildiń advokaty Danıar Aqtanov beısenbi, 14 qarashada tańerteń Azattyq Radıosynyń tilshisine belsendige qatysty aqparaty joǵyn, ýaqytsha qamaý ızolátoryna kirýge ruqsaty joǵyn aıtqan.

"Qashyp ketti me, qashyp ketken joq pa nemese ony ol jaqtan alyp ketti me, álde basqa ma, eshteńe belgisiz" depti advokat Danıar Aqtanov.

Tirek.info saıtynyń jazýynsha, 4 qarashada sot 42 jastaǵy belsendi Dýlat Aǵadildi "polısıaǵa baǵynbaǵany úshin" on táýlikke qamaǵan. Onyń aldynda belsendi "beıbit jıyn ótkizý tártibin buzǵany úshin" 15 táýlikke qamalyp shyqqan.