İshki ister mınıstrligi eks premer-mınıstr Serik Ahmetov pen eks-ulttyq ekonomıka mınıstri Qýandyq Bıshimbaevtyń isin qaraǵan tanymal tergeýshi Olesá Kekselge qatysty sotqa deıingi tergeýdi bastady, – dep Qamshy.kz aqparat agenttigi habarlaıdy.

"Azamat E.I.Nábıevtiń aryzy boıynsha sotqa deıingi tergeý amaldary júrgizilip jatyr, onyń barysynda aryzdanýshynyń dálelderi tekseriledi. Sotqa deıingi tergeýdiń málimetteri jarıa etilmeıdi", – dep Qazaqstan İİM baspasóz qyzmeti málim etti.

Aryz berýshi Erlan Nábıev – "Energo" JSHS dırektory, ol burynǵy energetıka vıse-mınıstri Anatolıı Shkarýpanyń isi boıynsha kúdikti retinde jaýap berip jatyr.   

"Qylmystyq is Nábıevtiń aryzy negizinde Bas prokýratýranyń Arnaıy prokýrorlar qyzmetiniń burynǵy basshysy Olesá Keksel men prokýror Baýyrjan Ǵabbasovqa qatysty azaptaý faktisi boıynsha tergelýde", – dep advokat Hamıda Aıtqalıeva Facebook jelisinde ishki ister mınıstrligi bastaǵan tergeýdi túsindirdi.

Qylmystyq is boıynsha bas prokýratýranyń qyzmetkerleri Qylmystyq kodekstiń 146-babynyń 1-bóligi – tergeýshiniń, anyqtaýshy tulǵanyń nemese olardyń ruqsatymen basqa adamnyń azaptalýshydan nemese ózge adamnan aqparat alý nemese moıyndatý maqsatynda qasaqana dene jáne (nemese) psıhıkalyq azap shektirýi boıynsha kúdikke ilindi.

Sondaı-aq kináli adamǵa bes myń aılyq eseptik kórsetkish (2019 jyly 1 AEK – 2525 teńge) mólsherinde aıyppul salynady nemese úsh jylǵa deıin belgili bir laýazymdardy atqarý nemese belgili bir qyzmetpen aınalysý quqyǵynan aıyrylyp, bes jylǵa deıin bas bostandyǵynan aıyrylýy múmkin.