Almaty ákimdiginiń baspasóz ortalyǵynda «Almaty-2050» Damý strategıasy týraly brıfıń ótti. Joba kópshiliktiń taldaýyna bıylǵy jyldyń 21 qarashasynda usynyldy, dep habarlaıdy ákimdiktiń resmı saıty.

Almaty qalasynyń Strategıa jáne búdjet basqarmasynyń basshysy Nurtas Qaırov qalanyń strategıalyq damýynyń jeti basymdyǵy engizilgen qujat jobasynyń qalaı jasalǵanyn túsindirdi.

Qoǵamdyq sarapshylardyń qatysýymen 23-31 qazan aralyǵynda ADO alańynda ótken jumys sesıalary barysynda qala aldynda turǵan 11 shaqyrylym anyqtaldy.

Strategıany ázirleýdiń jumys tobyna ákimdiktiń barlyq basqarmalarynyń, «Qala qurylysy jobasy ortalyǵy» JSHS, «ǴZI Almatybasjospar» JSHS, sonymen qatar «Almaty qalasyn damytý ortalyǵy» AQ qyzmetkerleri endi. Strategıa jobasyn ázirleýge Almaty qalasy strategıa jáne búdjet basqarmasy, AQDO, Hatch halyqaralyq kompanıa mamandary, qoǵamdyq sarapshylar, Qoǵamdyq jáne İskerlik keńester músheleri qatysty, – dep atap ótti Almaty qalasy strategıa jáne búdjet basqarmasynyń basshysy Nurtas Qaırov.

Shetsiz qala – barlyq aýdandarda ómir súrýdiń joǵary standarttary, ortalyqtandyrylǵan jáne qolaıly kóligi bar megapolıs. Almaty aglomerasıasynyń ıadrosy retinde qala Almaty oblysynyń qala mańyndaǵy aýdandarymen tyǵyz baılanysta damıtyn bolady. Damýdyń ortalyqtandyrylǵan modeli qalanyń joǵarǵy jáne tómengi, ortalyǵy men shetindegi aıyrmashylyqty boldyrmaýǵa múmkindik beredi.

«Aqyldy» qala – úzdik smart-tájirıbelerdi qoldanatyn megapolıs. Qalany josparlaýdyń sapasyn arttyrý «aqyldy» qala tehnologıasyn qoldaný arqyly ońtaıly sheshimder qabyldaýǵa múmkindik beretin ashyqtyq jáne málimetterge qoljetimdiligi esebinen qamtamasyz etiledi.

Teń múmkindikter qalasy – túrli múmkindikteri bar ınklúzıvti-adamı orta qalasy. Tolyq ashyqtyq jáne ataýly áleýmettik kómek qamtamasyz etiledi. Ony alý ýaqyty qysqarady. «Kedergisiz» orta qurylady – «barlyǵy úshin mobıldilik» qaǵıdasy boıynsha múmkindigi shekteýli jandarǵa qala ınfraqurylymy tolyq qoljetimdi bolady.

Qaýipsiz qala – qylmys jáne tótenshe jaǵdaı qaýpiniń tómen deńgeıli qalasy. Alshaq monıtorıń júıesi men habarlaýdyń ozyq sıfrly ınfraqurylymy jasalady. Ol qylmystyń deńgeıin tómendetedi, jol qozǵalysy qaýipsizdigin arttyrady jáne tótenshe jaǵdaıdy eskertedi.

Joǵary standartty ekologıa, qorshaǵan tabıǵı orta men qala ıntegrasıasy bar jasyl qala. Qalanyń «jasyl júıesi» qurylady. Ol qalanyń ekojúıesin biriktiredi men bıoalýantúrlilikti qoldaıtyn bolady. Taýlar sheksiz rekreasıonaldyq júktemeden jáne qurylystan qorǵalady.

Jahandyq iskerlik ortalyq – ekonomıkalyq belsendi ınovasıalyq qala, Jańa Jibek joly ortalyǵyndaǵy kólik-logıstıkalyq hab. Investısıany, tehnologıany jáne talanttardy tartatyn ortalyq. Sapaly adamı kapıtaldyń ıntellektýaldy-kreatıvti múmkindikteri qalany damytýdyń múltiksiz resýrstary bolady.

Mádenı kreatıvti qala – moda men standarttardy qalyptastyratyn bilimniń, turmystyń jáne buqaralyq mádenıettiń joǵary deńgeıi bar sýperzamanaýı qala. Mádenı ınfraqurylymdaǵy aıyrmashylyqty joıý maqsatynda salaýatty qoǵam negizinde mádenıet salasy modernızasıalanady.

Bul baǵyttar qalany damytý boljamyn qalyptastyrdy. Bul jumys isteýge jáne ómir súrýge tartymdy jahandyq qala, Ortalyq Azıanyń zıatkerlik jáne mádenı astanasy.

Sapaly qala ortasyn qurý, adamı kapıtaldy damytý, joǵarytıimdi ekonomıka, sonymen qatar qalany tıimdi basqarý qalany turaqty damytýdyń strategıalyq basty baǵyttary bolyp tabylady.

Strategıa jobasy qoǵamdyq talqylaý jáne usynystar men pikirlerin berý úshin Almaty-2050.kz saıtynda jarıalandy. Saıt jumys istegen alǵashqy táýlikte oǵan 6,8 myń adam qaraǵan jáne 200-den astam pikir men usynys qaldyrylǵan.